Hiri postalak
Jon Iriberri
OHAR BIOGRAFIKOA
(KALEAN PASATA)
Izan ere, ez hitunan ezkondu
baina antzerako zerbait-edo bahunan.
Pisua bien artean erosia,
haurtxo bat ere erdibana zinaten.
orain nork bere laguna eraman ohi din
nork bere pisu erdira.
Amandreak karta egin zien esanez
eurekin bizitzera joan nahi duela
***
EGARRI-BIZITZAK
Godaletari begira
ematen du bizia,
egarriak bene-
benetan eskatua
behin eta berriz
atzeratuz, beti
aurki baitaiteke
botila bitxiren bat,
beti gertatzen baita
edabe ezezagunik,
beti da fortunagarri
edan-goxo berririk.
(Eztarriaren estualdiak
atseden emen ohi dio
apur baterako,
eztarriko zartadek
golde-ildoekin duten antzak
lurrarekin lotuago-edo
sentiarazten baitu)
***
POTEOLARI BAKARTIAREN
GORAZARREA
Edalontziari so eginez
ematen du denbora,
denborak bene-
benetan eskatua
berandatuz, behin
eta berriz, zeren
ez den alkohola
bizitzak galdegina,
zeren ez den egarri
bizitzak demaiona.
***
ARMAIRU-MUTILARENA
Sagar irudiko, errauts zaporeko
taberna zulorik jendetsuenean,
bozgailu gorrenak emen aterpean,
han dun aurkituko armairu mutila.
Sagar irudiko heizela badakin;
beha une batez haren, leihatila
ez dun inoren zain ez inoren bila,
ezpada arropa zahargordetze lanean.
Zigarro mehearen amorruzko keak
horituak dizkin barruko izarak,
behin zuri izandako lihozko alkandorak.
Errauts zaporeko ohi zaion alkohola.
Sagar irudiko haizela badakin;
beha une batez haren leihatila.
Noizbait izango haiz zur-beira bereko;
izan nahirik eta ez jakinik nola,
errauts irudiko, sagar zaporeko.
***
AHOPEAN 2
Hala bada eta benetan
oherako keinu garbia egin badik,
amore emanizak,
ez hadi larritu,
eta soseguz
egizak bisita
haren lurralde epelera.
Eskertu ezak apal
ederraren opan iheskorra.
(Eta ez hadi gero gizon portatu...!)
***
AHOPEAN 1
Hala bada eta benetan
oherako keinu garbia egin badin,
amore eman zan,
ez hadi larritu,
eta soseguz
egizan bisita
haren lurralde epelera.
Eskertu ezan apal
ederraren opari iheskorra.
(Eta ez hadi gero emakume portatu...!)
***
AHALIK LABURREN
Jorge Riechmann
Mugaldean egin dantzan.
Albaína eman sokari.
Ez utzi karga bazterrean
Bestaldera ez pasa.
