Gernikaz errana
Bernard Manciet
I
- Eguraldi ederra
duzue Gernikan?
- Egun ederra hodei
arinekin
Eta ezkongaien
antzeko zuhaitz
loratuekin
- Ez ote duzue elurrik
Gernikan?
Akazia ondoek itsaso
gainera Lekeition
elur egiten dute
Bermeon itsasoa
udaberri bat da
- Goizalde polita ote
duzue goiztiri hotza?
Hegoaren hats epela
dugu Gernikan
Eta gudariek goizaren antzera
mendiak estaltzen
- Ortzantzarik etxetik ez ote duzue entzuten?
- Lilizko galernak ditugu mendien kizkurtzaile
Gernikako Haritza lili soil bilakatu da
- Etxetik tximistak ez dituzue ikusten?
- Ikusten ditugu San Migel mendian haserrearen aingeruak
Eta euskaldunak tximistan anai dira
- Alo! zuek Gernikatarrek beldurra etortzen ez duzue ikusten?
- Bi mila urte beldur eta ikara ditugu
Eta arras aspaldiagotik mendiak gure gainetik hegaldaka dabiltza
- Egia dea odola etortzen ez duzuela ikusten?
- Mendiak Mundakaren gainera zurrutaka urtu dira
Kristoren zauriak berrireki dira atseginez
II
- Alo! Bilbotarrak! ez ez dugu
ardo eskasik.
Barda arrats osoan ardoak
polkan ararazi gaitu
Gardokiren haurrak txistua jo
zuen
- Ez dugu - Alo! - janari
eskasik
Gatuak ihesi niauka eta
zakurrak marrumaz
Astoa karkailaka hiltegiaren
aintzinean
- Ametralladorak baditugu eta
atabalak
Eta Unzeta fabrikaren
muntadurak errendimendu
betean
Eta arrats osoan arrosorioen
metralla
- Hegazkinak Stukak baditugu
Gernikan
- Alo Bilbo! teilatu gainean bi
karmelita ditugu besoak zabalik
Enarabeltz eta hazi hegaldunez
bazterrak beteak dira
- Bonba xirulariak - Alo Bilbo! -
baditugu nahikoak
Okinaren adarra entzun behar
zenukete
Eta Oiz mendian mila bular zilatu
Arrosak ufakoek botatzen
dituzte arrosaz xirulaka dabiltza
Gernikan bonba argitzaile en
beharrik ez dugu
Suaren piztekoa badugu - ave
rosa mystica - Gardeniako
Andre dena Maria
- Alo! lur eskasik ez dugu
Ez eta ere trintxerra pala edo
pikotzik elgarren artean
Gure egoitzak hilobietan jarri
ditugu
III
- Eguraldi ederra duzue Gernikan?
- Badira iparraldetik datozen iguzki
ilunak
Elizdorreetako ezkila guziak
errondan kantarazten dizkigute
- Alo! Etxen eguraldi lasaia duzue?
- Juan Plazaren amona arroltzez
bete otarrearekin jausten ari da
Eta Don Tello kaleko atso xaharrak
biharko eltzekariarenak xuritzen ari
ditu
- Euria ote zenukete ? Alo Gernika!
- Zilarrezka euria dugu argi
sukratuen erditik
Gozoki egilearen emazte langileak
azukrean hiltzen ari dira
- Errazue - Errazue etxen duzue
ekaitz arramantza hori?
- Lasterka dabiltzan azokako suzko
idiak baizik ez dira
Jendearen gainetik badabiltza
- Udaberria duzue azkenean
Gernikan?
- Gerezi basa molkoek zazpi
metroko punpeak egiten dituzte
Gure gerezi basek haur molkoak
dauzkate
- Arratsa dea azkenean zuen
Haritzaren puntan?
- Goiztiria da ifernuan eta Haritza
daldaraka dabil
Mende honen goiztiriaren agurtzeko
Ikusi dugu - Bazko denbora da -
hilen artetik
Armaggedonen zaldia jauziz
jalgitzen
Erresorta iduri eta gure hil guzien
gainera erortzen
Alo hemen Parise! Ez du gehiago
erantzuten Gernikak
