Hago pixkat
T. Alunda
Blokeak zutitzen ditun urrunean,
bata bestearen atzetik,
altzagailuen harrokeriari aup eginez.
Behatz punttatan mantentzen haiz,
edifizio batetako
antena kolektiboan.
(Zenbat pizu duen ibaiak urbidean!)
Mila pote "Tipex"
kaleak zuriztatuz,
oinen aztarna gorrotagarria
desagertzeko.
Ni, hiri begira,
kamioietako neumatikoen pean
dardarka dagoen
zubi batetako barandan eseria.
Egunsentitik
galtzairu txirbil urdinak
deslotzen ditun,
(euri metalurgikoa),
eta ketan biribildu,
helize bat bezala.
Ur beltzatan
(ardo okatua),
arrai batzu itotzen ditun,
eta antxetek
erraiak gurkatu,
hesteen laberintoan
mokoa eradotuz.
Beste antena batetaraino
salto egin dun jada,
kasik herzioen bidea jarraituz,
blokeen kontra borrokatzeaz
ase dagoen haizeari putz eginez,
hire kontra borrokatzeaz ase,
nire kontra eta,
ezagutzen ez dituen etsai guztien
kontra borrokatzeaz ase dagoen
haize umila.
Begiak ixten ditinat,
eta burua bota,
hire esku jelatu
eta suminkoiengatik
hartuta izatearen
esperantza alperraz.
Bildotsa
etengabe lo,
otsoen egarri
gartsuagatik.
Bere artile zuriaren
azpian
bere erraietako
haragi urratua.
Piztien begiek
kolore beltza
berreskuratu dute,
gorri guztia,
gorroto osoa,
aiher dena,
bildots lokartuaren
gorpu
eroso eta berotik
eskegita
gelditu da.
|