Hamar milagarren goiza azotez

Lucien Etxezaharreta

 Jarraitzeko nahia etsipenak

 zangopilatzen duelarik biziaren keinu

 edozeinen distira nahi zenukeela

 Zelulako gau luzearen ondotik egunak

 daukan leinuru dudagarria ordu ezinduen

 orratz zitalez

 Gogoan mila karkuluek hatsarriko

 ozketara baizik etzaituztelarik eramaten

 Bakarrik gizon oste bati buru

 Zure izaitearen jabe hauskorra

 Borobilkaturik zimeta hotzean

 Goiz huntan

 Hamar milagarren goiza da azotez

 Intxaurrondo, Basauri, Marrake edo

 Hendaiako polizetxe moderno efikaz

 automatizatuetan

 Edo kuartel eta gela zaharren zikin

 ustelean

 Fresnes-tik Puerto Santa Maria-raino

 Goiz huntan

 Hamar milagarren goiza da azotez

 Gau bizi

 Suaren hazi

 Nahiaren gezi

 Tinko zaude libertatearen heresi

 Bizirik zaudela nahi jakinarazi

 Goiz huntan

 Hamar milagarren goiza da azotez

 Mendeek lehertzen mendi lerro

 zorrotza

 Neskaren irria bihar hilhobi hotza

 Kartzelek mundu guziko ikara hotsa

 Eta goiz huntan

 Hamar milagarren goiza azotez

 Zerrailu burdin azantz zorrotz

 hausgarria

 Goizaldera azkenean amentsa halan

 zohala ferdearen hari goxoez ur bazterrreko

 xurxuriez

 Hasperen moztua barnean murru

 zurpail barneko argi bihotz gabekoaren xori

 presoa

 Goiz huntan

 Hamar milagarren goiza azotez,

 Kuraiaren zitadelak orain altxa balitza

 harresiak...

 Orain ditut barneko zainen suak behar,

 aurkako guziak erhausten dituzten sinestezko

 su beroak

 Orain zaitut behar maitasun urruna

 biziaren ezkinan jarri zinena zeru lurrak argi

 indarrez apainduz

 Orain hor bazina

 Orain zure edertasunez ahalgezko

 burdinez gizon mutil morroi haueri atea,

 hesteko

 Zure edertasunez zauri koropiloen

 utsu ustela garbitzeko

 Begien behako galduari zeru zelaia

 xutitzeko

 Altxa balite libertatearen irriak

 Altxa balite burdinezko ate hauen

 atzeko itxaropen loreak

 Halabjako gaz zitalek hil haurren

 josteta etengabeak ager balite

 Mi Lai-ko neska gazteen jauntzi

 lilidunak

 Kabyliako napalmek beiztu mexta

 urdinetako bizi keak

 Altxatzen bazina mundu lehertu

 mundu umiliatu

 mundu baztertua

 Altxatzen bazina zureganako dudan

 maitasuna...

 Goiz huntan

 Hamar milagarren goiza baita

 Hamar milagarren goiza azotez

 Altxatzen bazina zu ene herriko

 zanpatua dirudunen seska jostakina

 Beldurraren harresia ezaba baledi

 Biziaren halduru zaren hura

 Jestu bakar batez

 Bakar batez

 Batez

 Esperantzaren su seinale erregarria

 pizten bazinu Afrikako belardiak haize eroak

 suz eta otiez basamortu egiten dituen

 moldean

 Bere kartzelako burdineri Nazim

 Hikmet-ek botatzen zuen mezuaren moldean

 Yusuf-en untzia asmatzen bazinu itsasoak

 iraganez Bartzelonako portuko jazarketa

 iraultzaren su libroan berotzeko

 Goiz huntan

 Hamar milagarren goiza azotez

 Hamar mila ziren

 Ekialdeko portuan untziak erre eta

 mortuan sartu zirenak

 Urre untzien bila...

 Plazan libro urrearen truke

 Ez da urrungo printzesik sultanoaren

 bahitua urrearen truke libra lezakeenik

 Penetan direri lagun herritarrak baizik

 Janisario berrien zimeterren

 zorrotzak desafiatzen dituztenak baizik

 Jaun gezurti traidoreen balakatzearen

 mahain apainduetako zilarrezko untzi

 loredunetan aurkitu usai ustela salatu dutenak

 baizik

 Goiz huntan

 Hamar milagarren goiz huntan azotez

 Zuekin naiz

 Nerekin zarete

 Gabonetako suak ez eta Jondoni

 Juanetakoak ez eta Santioko izar bide

 amesgarria ikusiko ez dituen horrekin zarete

 Libertatearen hortzez egunak eta

 mendeak hautsikitzen duzutenekin

 Goldeko nabala ezpata bihurtu duzuten

 esklabo jazarriekin

 Suaz eta azotez zigortu lagun libreekin

 Munduko bazterretan zuzi zerrenda

 ezin bukatuzkoa osatzen duzuten Tashunca

 Uitco edo Tupac edo Camilo edo Rosa edo

 Nguyen edo Ben Mhidi edo Louise edo

 Mordeshai edo Josu nagusiek eta jabeek

 puskatu erhautsi zaituzten zuziak hemengo

 zilo beltz heze hotzak argitzen eta berotzen

 didazutenak

 Goiz huntan apokalipsia berri bat dator

 zazpi ezpata distirantek zure aurpegian hartu

 dute zure irria zure sua zure besoen eztia

 zure sabelaren aterbe beroa eskaini didate

 zure hats beroak barnea kurritzen dit zure

 ura nere baitan dabil zure begiek zerrailuak

 oro hautsi dituzte zatoz argi jantzian murru

 leun esperantza ezin zutituek zikinduak erori

 dire ur eta argi hur eta gaztain hegazti eta

 arrain lur eta zeru indar eta ahul gaueko eta

 eguneko zeroa eta amaigabea izar eta buztin

 hauts eta mendi hazi eta zuhaitz lehor eta

 haitz erraz eta gaitz min eta dolamen atsegin

 eta hats hats zure hats bero

 Goiz huntan

 Azoteen jauziek ez dute min egiten

 Goiz huntan

 zuekin

 zurekin

 zu...