Neska hori
Mayi Pelot
Gorputza liraina
urratsa arina
ile horail-nabarrak bizkarrean ixurtzen
dituen
neska hori
ni baino
eder azkarragoa zela
banekian
bidexkan gaindi
belarra, urdina
ilargi gorria
lurra,sugarra
dituen
ibarrera
elgarrekin zindoaztela,
ihia bezain zibila den
neska hori
hire ondoan somatzean
haren aurpegia ikusi gabe
banekian
bai eta ere
haren ausikadak
ezagutu-ta
haren ahoaren gozo samiņa
ez duala
ahantziko.
Belarra xixtuka
mendia ihitzez
iratsak negarrez
errekak oihuka
zuen sorbaldak ibiliz
elgar hunkitzen zuten eta
arroka nabarraren ondoan
haren esku luzeak
hire aldaka hertsietan jarriak
ikusiz
egin nian ihes.
Orain mendira joatera
ez nauk atrebitzen
zuen gorputzen besarkaturik aurkitzeko
beldurrez.
Baitzekiat
ta bait dakik
neska hori
herioa
dela.
