Bermiorantzeko pinua
Sesmero-Cutanda
Hodeien pausaleku iraunkorra
arroketan lasaia,
mintzo zaizun leizea
bihurtzen diharduzu irribarretsu
ezkontzeko uhinak eta arkaitza.
Itsas lainoentzat ametsen sare,
labirinto, segada,
orratz misteriotsua
harekin josteko haiee ildoak
nare ezabatuz haien bidaia.
Ez dakit zer jainkok deitu zintuen
otoitzen ari den zurezko eskua
izaiteko, beretzat gorespena.
Nork zintuen utzi, musu, opari,
arroken artetik guztiz goxoa,
lehuntzeko, ixil, nire bidea
maitalerik xamurrenak bezala.
Orain, noalarik ororen bila,
asetzen ez den garra;
orain, oro bortitz, mingor, hestura,
gaineztatzen dela nire uharka,
amodioz beterik etor dakidan
bizitzaren bolada
baketuz nire ura,
itsasora heltzeko, maitatuz gero
emankorra, loratzen den hibaia;
eta gardena izan, euri distira
abarren amaraunak
ehiztaturikoa,
aurki dezadan, lurrak edanik,
zure sustraietan azken ibarra.