Apez

Daniel Landart

 Euskal Herriko apezetan

 parrasta on bat ezagutzen dut.

 Ba da denetarik...

 Funtsean; andana pollita ba dugu

 orainokoan segurik!

 ***

 Guztiek, beren gisan

 Jainkoa zerbitzatzen dute

 eta oroz gainetik laudatzen.

 Baina; batzu halere

 Jainkoaz eta erlijioaz

 ez ote dira ederki baliatzen?

 ***

 Dena dela; gutartean bizi zen

 apez gazte zintzo bati

 emeki emeki fedea epeldu zaio

 batzuen "garra" ikusita gero...

 Eta, hiru urte dudamudan egonik

 anitz gogoeta samin eginik

 azkenean

 apezgoa utzi du.

 ***

 Euskal Herrian nahiko zuen gelditu...

 Lehen-bait-lehen, edozein lani lotu...

 Baina inork ez dio atea zabaldu.

 Etxekoak, lotsaz, nigarretan

 Kristauek aldiz ele-txarra mihi punttan

 Eta apez ongi-bizi nahiak

 berena gogoan:

 "Vade retro, Satana. - Gora gure sotana!"

 ***

 Joan da beraz gure apez-ohia, ixilik.

 Ixilik, bakarrik, biluzirik,

 gibelera so egin gabe; urratsa luzatuz...

 Euskal Herritik biziki urrun den

 beste Golgotha bati buruz.

 ***

 Eta geroztik; nago

 ez ote den errexago

 Fededun izatea

 Fede gabe baino?