inprimatu
Aprendiz
Izenburua:
Aprendiz
Sinadura:
Daniel Landart
Urkizaren iruzkina:
Egilea(k):
Landart, Daniel

Argitalpena:
Maiatz.
Urtea:
1984
Argitalpenaren urtea:
Alea:
7.zk.
Orrialdea:
32

Aprendiz

 

Daniel Landart

 

 Hamalau urte baizik ez nituen

 Donoztiritik Baionara etorri nintzelarik

 gogoa ilunik

 inprenta batetan aprendiz sartzeko,

 ofizio "on" bat ikasteko,

 hots; langile bilakatzeko.

 

 ***

 

 Ordu arte familiakoekin

 baserrian bizi izana nintzen.

 Nantxet, lau mendiņoren erdian,

 Otso-Zelai aldeko bakean,

 bakean eta... hatsaren gainean,

 gure behi, zaldi, ardi, zerri

 oilo, ahate eta gaineratekoekin...

 

 ***

 

 Gure etxean, denok euskaraz hitz egiten genuen,

 euskaraz bakarrik

 Eta arratsetan; behi deizten ari zelarik,

 aitak biziki maite zuen euskal alorreko

 kantu zahar edo berrien xaramelatzea

 eta guk haien entzutea.

 

 ***

 

 Gure zokotik ez ginen maiz ateratzen'

 funtsean hauzokoekin gurutzatzea aski zitzaigun

 dela belar, ogi joite ala arto-xuritze

 elkarrekin ederki akomodatzen ginen!

 Baina nekazaritzatik kanpo, tirrit.

 Ez genekien hiriko bizia zer zen,

 are gutiago lantegi bat zer zitekeen...

 

 ***

 

 Alta; hazaroko astelehen goiz batez

 (bihotza pil pil eta erdi-negarrez)

 mundu berri baten ezagutza egin nuen,

 edo bederen,

 ezagutzaren egiten hasi,

 ene buruari galdetzen niola

 non deabru sartu naiz ni?

 

 ***

 

 Langileak, gehienak urdinez bezti

 makina haundien aurrean edo ondoan

 ari ziren, ari ziren serioski

 batzuek begibazterraz so egiten zidaten

 besteek kasurik ere ez.

 Jaun batek erakutsi zidan ene laneko lekua,

 eta frantsesez zerbaixka erranik,

 bakarrik utzi ninduen erdi-zozotua.

 Ez nakien batere

 zergertatzen zitzaigun...

 

 Horra, horra zein xinpleki

 baserritar "nagusi" baten semea,

 aprendiz egonik humilki,

 bilakatu den langilea.

 


inprimatu