Buruz beheiti hegoari

Manex Lanathua

 Ilargiaren errotan

 goazen biribilka.

 Buruz behiti

 zangoak zerura

 karmanolez karmanola

 goazen biribilka

 osto zimelduetan

 elgar arrapaka.

 Haizatu nuen haizea,

 haizera,

 urrun,

 joan zedin

 hurbiletik urrunera.

 - Nik etsitu gabe,

 etxeko leio zuriak

 hetsi ditut.

 Haizea urrun joan zedin,

 uxatu dut, uxu! uxu!,

 ufatuz, ufa,

 matela sakoletarik.

 Ixil,

 ixo! ixo!

 ixildurik,

 sartu naiz aterpean,

 leio zurien,

 pean.

 Begiz-begi zuri begira

 amesten ditut hamar itsas bazter

 hamar xixtu soinu

 hamar hitz ixilek erran eztitasun guzia.

 Haizearen pare izan naiteke, haize,

 mendiaren gainetik zureganatzeko,

 lorearen pare izan naiteke, lore,

 usain bakan gozoak

 zureganatzeko.

 Begiz-begi, larruz-larru

 gure bihotzen soroetara

 goazen,

 usain gozoak, lore bakanak

 eta iheska joan zaizkigun berdadura freskoak

 gureganatzeko.

 Harriz-harri erreka punpaka doala

 egun berri baten atarian

 ottiak kirrikatzen du.

 Begiz-begi zuri begira

 amesten ditut hamar itsas bazter.

 Begiz-begi zuri begira

 amesten ditut hamar itsas bazter.

 Larrazkeneko osto ximelaren altzoan,

 izar trosten eta zirrikaden pean,

 maitaleen euri pean.