Hauta-minak

Oihan

 Zer da maitasuna?

 Zurekin egon nahi baina ezin

 Zergatik ezin?

 Zutaz dudan egarria

 Harekin ditudan lokarriak,

 Zer hauta, nor hauta

 Zergatik hautatu behar?

 Bakea edo guda

 Ur geldia edo sua?

 Beldurra, beldurra

 Zureganako maitasunaren beldurra

 Beldurra eta beharra

 Zure ezpainen beharra, gosea.

 Askatesuna

 Zure laztanetan, haren goxotasunean ote dago?

 Askatasunik ez dago

 Aterabiderik ere ez.

 Maite zaitut eta behar nau

 Behar zaitut eta maite nau.

 Zure begi ikatzen gorian erre

 Haren begien ibai garbian ito

 Desagertu, ahantzi, etengabeko hutsunean murgildu,

 Bihotzaren bi zati minberatuek bat egin dezaten.

 Nor jarraiki?

 Hautatu beharra, zertarako?

 Mina, mina, hauta-mina.

 Itsu bihurtu naiz

 Zure abestiak gidatzen nau

 Ibil eta ibil, beti aurrera,

 Zure bila bidegurutzeraino

 Eta han haren abotsak zurea itzaltzen du.

 Gelditu, bere alderantz urrats bat egin.

 Zure deia oihu bilakatu da.

 Itzuli. Non zaude?

 Lasterka, hegaka zuregana nator

 Hor zaude, hor hurbilean.

 Besoak luzatu, eskuak ideki

 Hunkituko zaitut, ez naiz geldituko.

 Nahimenik ez.

 Indar batek narama, indar hori naiz ni.

 Zure oihua azkarrena da

 Baina haren negarra... EZ!

 Isiltasuna

 iluna

 Bakarrik

 Bakar bakarrik

 Bakartasun hotza betiko laguntzat

 Hor uzten dizut bihotz erdia

 Beste zatia harek darama

 Nik ez dut bihotzik behar.