Non stop

Shaktale

 Ez geratu zure ibilbide intergalaktikoan

 jarrai aurrera plastikozko paradisuen erregina bihurtu arte.

 Ahaztu iragana eta ez geroan pentsatu

 pilulatxoz eraikitako amets sintetikoen itsasoetan.

 Mozorrotu zure burua arimaren biluztasuna

 erakusteak lotsa emango balizu bezala,

 rimmel dotoreak eta Margaret Astor diseinuzko ezpainek

 gaueko erregina izendatuko zaituzte,

 plataformadun zapata eta larruzko minigonek indartu dute

 ordu txikietan megadantzalekuetako pistetan lortutako protagonismo

 efimeroa.

 Komun ondoko laztanen kubalibre zaporea ondo dastatu

 eta sexu azkeneko orgasmoen eldarnioaz ikutu zerua.

 Mundua buruz behera, ispilu deformatzaile batean ikusi...

 astelehen goizak eta ajearen jostorratzek harrika apurtuko duten

 ispiluan.