Stop-aren azken autoak

Okendo

 Hiri denen antzera

 honako hiriak ere baditu bere STOPak.

 Hiritik at

 STOP bakandu bat,

 galeoi zaharren antzera

 ondare baliotsua.

 Populazio demasaren agonia,

 bertan haizearen pasodobleak akitu

 eta menditik datorren ekia

 ez dago berotasuna emateko kariaz.

 Poza darien «L»dun gidariek

 sakontasun abisalenetaraino zapalduz,

 nola euki STOPa gogotan?

 Zahar ahituenek,

 memoria txautu gabekoek ere

 paso egiten —bait— dute.

 Arratsa iluntzear dagoela,

 gazteen kontzentrazio gunea.

 Etenik gabeko gazte piloa

 autoren bat xerkatu nahian.

 Neskak soineko flabelatuz

 eta mutilak

 alkandora baldarrenaz

 auto STOP.

 Ostantzeko kapitalista kokiztuak

 ez bezala,

 asteburuetan auzi larriak

 izaten dituzte desplazatzeko.

 Baina STOP seinalea

 kondenaturik dago

 metro kuadratu bakoitza

 ikutzen duen elur maluta,

 euri tanta edo

 negar anpulu bakoitza kontrolatzera,

 legearen arabera dago metro kuadratuko

 populatzearen salneurria eta,

 hamar mila pelatik gora.

 Zahartzearen definizioa

 inhalatzen du seinale honek,

 jakinaren gainean dago

 katedraleak kudeatzen diren antzera

 STOP seinaleak zehatu egiten direla.