Sonetoa

Luis de Góngora

Euskaratzailea: Gerardo Markuleta

 Hire adatsaren urregorriarekin lehian

 eguzkiak alperrik argitzen duen bitartean;

 lautadaren erdian hire kopeta xuriak

 eder lilia gutxiesten duen artean;

         hire ezpain bakoitzari, harrapatu guran,

 krabelin goiztiarrei baino begi gehiagok darraion

 eta hire lepo lerdena beira dizdiratsuaren gainetik

 garaile suertatzen den honetan;

         goza itzan lepo, adats, kopeta eta ezpain,

 harik eta hire adin urrezkoan

 urregorri, lili, krabelin, beira dizdiratsu zena

         ez soilik zilar edo bioleta ustel bilakatu baino lehen,

 baizik eta guzi hori batean

 lur, ke, hauts, ilun, ezerez bihur dadin baino lehen.

 Sonetoa:Luis de Góngora, Poetas de los siglos XVI y XVII; CSIC, Madrid, 1970.

 Gerardo Markuletak euskaratua.