Hiri honetan barrena

Aingeru Epalza

 Ez-ustez, Franz-ekin

 egin dugu egun begiz-begi

 Milagrosako pisuko sukalde zikineko

 labe erdoilean, xomorroz jauntzirik.

 Prozesuan pairatu zigorraz

 gozatsu zirudien.

 Jack, atzo agurtu nuen

 San Jorgeko bidegurutzean

 porro bat estekatzen ari zela

 bidean abian

 beti bezain fardel

 —batzuk ez dira enteratzen—.

 Malcolm gaur gauez kausituko

 dut, seguraski, arrastirian

 Jarautako ohizko zoko

 ilunberan, sonbreilu mejikarrez

 arindua, patxaran

 eta heriotzaren arteko

 larunbateroko sumendipean.

 Marcel-en deirik oraingoan

 ez dut izan, ordea

 baina gaztelurik gabeko enparantzako

 terraza zale batek erranda,

 galdutako denbora

 berreskuratu ezinik omen dabil

 Altzuzako bere txaletean

 pajaritari tira eta tira.

 Henry akaturik dago.

 Zurrumurruek diotenez,

 ez da onik aterako

 Kuriako txabiske purtzil hartako

 puta portugesaren tropikoak

 —edo Iturramako pija harenak?—

 kutsatutakoaz.

 Ez orain ez gero, Axularren aztarrenik

 ez da nehon ageri.