Arituen parada: Koldo Izagirre
Koldo Izagirre
Idazten afizioz hasi omen zen pasaitar honi egin diogu Korrok
honetarako "gonbitea". Bibote elegantea, ile kixkurra, ttikipottoloa, ongi
enkajatu zuen golpea telefonoz deituta, soken kontra akorralatura, "hi,
bigotes, Korrokerako zerbait idatzi behar duk!" jaulki genionean, sinpatikoa.
Papina Ustelaaldizkari literarioaren bidez ezagutu genuen guk. Baina
Zeruko Argian, Oh Euzkadineta azkeneko Susa-ren orrietan ere ikusi dugu bere
firma. Lan luzeagoak egin ditu, "Oinaze zaharrera", "Guardasola ahantzia" eta
"Gauzetan" prosa eta poesia liburuak lekuko. Inbestigazio lan mardultzat jo
genezakeen liburu lodikotea (motxila aproposa erosi behar izan zuen gutako
batek hori garraiatzeko!) ere eskaini zigun "Euskal Lokuzioak" izenburupean.
Zinegintzan ere aritua omen da, "Ikuska"etan eta, sari bat bederen bereganatua
duelarik, baina ez dakizkigu bere lanen izenak (ez, "Tasio" ez omen da berea).
Korrokero romantikoenak esan digu ahantzi gabe aipatzeko Imanol-ek kantatzen
dituen Koldoren "Ene haserrea" eta "Zure bularretan" poemak.
Hilabete honetan edo argitaratuko omen du bere lehendabiziko nobela
"Euzkadi merezi zuten" izenekoa, hain xuxen..., eta gehiago ere izanen
duelakoan gaude, baina guk ez jakiki, eta aipatutako nobela horren zai gauden
bitartean honatx bidali digun aperitiboa. Mila esker, Koldo.
Hamar bertso berri Kantabriako partean
1
Baionatik Bilbora
itsaso barea
maria behetik gora
zer bakardadea.
2
Baionatik Bilbora
itsaso antzua
han zuen harro utzi
Okendok zantzua.
3
Baionatik Bilbora
lapa ta lanperna
handikan honeraino
Okendoren pena.
4
Baionatik Bilbora
itsaso petrala
aspaldi esan zidaten
besterik ez zala.
5
Baionatik Bilbora
itsaso aingura
nadila zure albora
oraindik ingura.
6
Baionatik Bilbora
itsaso zakarra
baldin baneki nora
kamino bakarra.
7
Baionatik Bilbora
itsaso pobrea
non du aurkitu behar
Euskadik hobea.
8
Baionatik Bilbora
itsaso euskara
Baionatik Bilbora
galduak ez gara.
9
Baionatik Bilbora
itsaso gorria
Baionatik Bilbora
gure memoria.
10
Bilbotik Baionara
alua itsasoa
iheri ez dakiena
hondarrera doa.