Maitasuna ez da maitatua
Loramendi
Udazkena zan. Odol tantozko
ezti-margoa
eguzki-galduk zixurin.
Ibar-gangarrak doi-doi bekozten...
Arrats-giroa
atsegiñaren atsegin
Sartalde-goian izpi trinkoak
jolas zegiten.
Ibai-ertzetan sorgin-ardoak
ditu moxkortzen
sasi-ama ta xulufrin.
Muñoan ziarduten aspaldi poxpoliñak;
baratzean txoriak txirri-otska lertzen.
Ostendu zan euzkia, «urrezko talo ederra!»
lurriñez sagardia zuela estaltzen.
Ta amilka daror mendi-kolkotik
itur-aria:
basauntzen mama gozoa.
Untzak lanbrotuz iges dirudi
suge lodia...
gorde-ageriz lepoa.
Ta abeska poil-poil, zurrunbilotsu,
mur-mur ta zotin,
bere betiko leloa,
Astintzen ditu sarats itunak
¡ta arindu ezin
negarka zegon xoxoa!
Txioka dabil xoxo mindua
adarrik-adar:
zerbait zekusan sasian...;
lotan zetzala pizti zarren bat
narraska zear,
lapurki sartu kabian.
Ega motxean minduki dagi
pir-pir samiñak,
kulunka sarats-gerrian.
Iruntsi naian badabiltz nunbait
pizti muskiñak...,
badakus zerbait azpian.
Maitasuna gañezka naigabea toutorka
ara or Asistarra, Goi-gotzon galdua.
Sukarretan biotza, urraturik bularra,
zauriak gori-gori, ai! odolustua...
«Ene! nere Jaun Ona!-oyu aundiz ziotzan-
ene! maitasuna iñon ez da maitatua!»
Xamurtu zuten xoxo-amaren
pio zorrotzak;
biozti urbil zitzaion...
«¿Zer dek negarka, xoxo ansia?
¿Jarrai mirotzak?...
Ator niganontz»-zesaion.
«¿Kabi barrendik etsai maltzurrak
atera al aute?...»
-berriro galdetu zion.-
Esku ertzera ¡parra!... egatuz
kiñuak tarte,
baietz, baietz!... zerantzuion.
«Egia diok, beraz-orrazturik ziotsan-
Ire lagun nauk, bada. ¿Norantz dek kabia?»
¡Purrust!... ega batean sasi-pean sarturik
adierazi zion nun zegon etsai.
¡Ura etsai!... So dagi aruntz
¡ta arri biurtu!:
kabian suge zitala!
Ume tartean biribildurik
guzien buru,
zai zeukan kankar zabala.
Amorru biziz odol-usmoka
zegien garaiz,
limurtuz larru azala,
«¡Suge azala, suge anaia!,
¿nolaz ari aiz
itotzen ume makala?»
Eldu zion lepotik, sumindurik Prantziskok,
astindu zuan zumez, urratuz eztena.
Ta irristzda luzean, lerdea zeriola
eskuta zan txistuka sasien barrena.
Moko xabalik ume minberak
jan eske zeuden:
eldu zitzaien Prantzisko...
Ta amari batez beatz-mamiaz
eman zizkien
igortzi leun ta jan naiko.
Maitasuna gañezka, naigabea tontorka
biurtu da negarrez Serapin mindua,
«Ene! nere Jaun Ona!: suge gaiztoak nunai,
¡Maitasuna ez da-ta guztiz maitatua!»