Zugabetasuna

Xu

 badakizu zelako gaitza egiten zaidan

 zure irudia asmatu zirriborratu eta gorpuztea

 hemen ez zaudenean

 badakizu zure ezpain anilen

 kakao-ilearen eta begi iruzurtien kolorea

 isladatzeko nabardurarik ez daukadala

 ez dagoela

           ezta litezkeen 36.660 konbinazioetan ere

 hemen ez zaudenean

 badakizu zure irri samur eta putaseme hori

 ez zaiola ohialari itsatsiko

 eta negarranpuloek pintura urtzen dutela

 hemen ez zaudenean

 badakizu musu hutsalenak ere ezin direla marraztu

 laztanek ehotik ihes egiten dutela

 eta mintzoa kordegabetuaren oihartzunera murrizten dela

 hemen ez zaudenean

 badakizu zure titi gurien

 eta masail gorrien hiru dimentsioak

 koadroaren bietan zapaltzea ezinezkoa dela

 ta zure or-ez-tak or-bai-n bihurtzen direla

 hemen ez zaudenean

 badakizu zerbaiten falta

 estaltzeko pintatzen dela

 dudala alferrik

 eta lelokeria koldarra dela

 hitzak bortxatzea

 hemen ez zaudenean

 eta hemen zaudenean

 ezen

 zer jakingo duzu zuk

 beti jokoz kanpo dabilen ustel honek

 begiz begi

 ezer esan beharrean

 hitzei eskua sartu eta

 honelako eraikuntza sukartsuak altxatzeari ekiten badiot

 hemen ez zaudenean

 hemen ez zaudenean

 eta hemen ez zaudenean