Lodinowsky

                   1

 Abertzaletasun, askatasun,

 alkartasun patentea

 daukaten asko ezagutuz

 haiekin hitzeginez

 konturatu naiz

 ezer jaten ez badute

 kiratsa dariela.

 Elikagaia kausitzean

 gauzak aldatu egiten dira

 orduan zinera goaz

 eta ezin diogu inori errurik egotzi

 gozariko elkarrizketatik

 bazkalondoko manifestazioaz

 bertso afarira arte.

                   2

 Maitatu maitatua izan gabe

 zutaz idatzi

 idatzia izan gabe

 zer zaila izan behar den

 Txinatik etortzea

 eta Durangotik zabiltzala

 txinoz hitzegiten

 jatetxe txinar bat zabaltzeko

 ez duzula baimenik jakitea.

                   3

 Udaberria heltzear dago

 horregatik ekarri dut kitarra hau

 arbola honen pean kantatzeko,

 ea osto mardulak hazten zaizkion

 erretzeko behar ditugulako.

 Baina ez gara zorabiatuko,

 adimenaz jabetuko baino,

 arbola honek badu eta,

 zerbait gogora datorkidana:

 denboraren iraupenaz

 ezin daitekeela

 denborarik galdu.

                   4

 Ikas ingelesa, ikas informatika

 ezkon zaitez zuriz,

 bizi urdinez,

 baina gertatuko ez balitz ere

 adi egon!!

 egunen baten baliteke zu bahitzea

 baliteke biok bernro lotzea

 eta orduan zin dagizut

 orru handi bat entzungo dela

 konturatuko baitzara mila urtez izandakoa

 segundo bati dagokiola,

 halere nahikoa,

 heriotzaren bestekaldea ikusiko baitugu

 elkarri begiratuz.

                   5

 Lanetik botako naute,

 nire tesia txapuza bat izango da,

 neuk idatzitako poesiak beste batek sinatuko ditu,

 emaztegaiak utziko nau.

 Baina beste lanbide bat aurkituko dut, hobea

 gustokoa ez izan arren.

 Beste tesi bat egingo dut, bobea

 gaia desatsegina izanik ere.

 Beste poesia batzu idatziko ditut, hobeak

 nahiz eta sekulan ez argitaratu.

 Beste emaztegai bat lortuko dut, hobea

 zaharragoa izanagatik.

 Eta horrrela bizitzari zentzua emango diogu,

 orduan konturatuko gara

 egindakoak merezi izan duela

 zer nahi den ere.

                   6

 Zuen koadrillakoa izan nahi dut,

 barikua kartetan emango dugu

 eta gero mozkortuko gara,

 zapatuero afaria txokoan

 eta ahal izanez gero larrua jo ere,

 domekan, bernz, zinera edo futbolera.

 Zuen koadrillan ere barikuan mozkortu

 eta domeka arte murgilduta egon daiteke

 gero astebarruan lanera bagoaz ere.

 Baina zuen koadrillan

 poemak egin daitezke,

 kiroletan aritu

 eta borrokalaria izan.

 Ez da inor harrituko.

                   7

 Lainotu zen ortzea

 poesia hau idazteko ordu erdiz

 eta euria hasi zuen orduan,

 gero agure hari zapatilak busti zitzaizkion

 ez baitziren markakoak ez modakoak.

 Baina ez zen horren ardura

 ardoa edateko bazeukan nahikoa,

 lasai zegoen,

 irakurtzen ari zen nobelako orrialdea

 ez zelako inparea.

 Eta horrek zorte ona ekarri dio

 badakielako hor nonbait ez daukatela

 ardorik edateko

 ez nobelak irakurtzeko

 ez markakoak ez diren zapatilarik bustitzeko.

                   8

 Inesiboa

 estilizazio era bat da

 hura erabiliz azalpen ugari

 ekiditen dira

 horregaitik jakin izan dugu

 heldu zarenean

 sapaian

 narrutan

 izan zinela atzo zortzietan.

                   9

 Maitale igo hadi

 maitearen bila

 eta lapurtu iezaiok bere hobezintasuna

 baina kontu handiz

 ez baita bibolin musikaz asaldatzen.

                   10

 Maite dugu udazkena

 gaztainen puzkar usaintsuak,

 mazusten txistukada moreak,

 nikaloen gernu laranjak,

 gibelaren azalia,

 eta barre egiteko

 muker, uzkur, elur eta mudurrien

 jautsapenak.

                   11

 Abionetatik bota nuen

 propaganda guztia

 Pasaiako itsasontzia

 desleitu banu bezala

 Elorrioko tabernako neskatila

 begietsiz.

 Iurretarraren esanetan:

 txikle freskoa aintzat hartu gabe

 bihotz hatsari helduz.

                   12

 Egia da edozein gauza

 edozein gizaki

 maite ahal dudala.

 Horregaitik

 ohe ertzak zure atzamarrak

 harrapatu zituenean

 maite izan nuen

 ur oxigenatua

 merkromina

 tiritak eta

 solegitu nahi ninduten

 hitz haiek ere.

                   13

 Garasta itzazu

 makotu ezin denaren

 behatzetako atzazkalak

 orkestra emanaldiko

 tarteko eztulak

 oporretan joateko

 ez dituzun gogoak

 eta agian maitasun sastrakak

 haziko zaizkizu.

 Lankerioen malkoak

 erabili dituzulako

 inor baino azkarragoa

 nahi izateagatik.

                   14

 Bihotzak krask egin dizu

 eta beharbada

 ez zait asko inporta

 zimentarrizko euria

 ari du orain

 eta ni frontoiko zolu ondoan

 naukazu

 nola lehertzen diren

 ikusten, ikusten, ikusten.

                   15

 Aitziberri

 Ai munduaren atalaseko

 haragi hezigaitzaren

 amarrugabeko neska

 estupidoa!!!

 Eros itzan

 Txinako zeta guztiak

 jakin gabe zertarako.