inprimatu
Keak estaltzen din hire aurpegia Afrika
Izenburua:
Keak estaltzen din hire aurpegia Afrika
Sinadura:
Manex Mujika
Urkizaren iruzkina:
Egilea(k):
Mujika, Manex

Argitalpena:
Susa.
Urtea:
1994
Argitalpenaren urtea:
Alea:
33.zk.
Orrialdea:
24-25

Manex Mujika

 

 Keak estaltzen din hire aurpegia Afrika

 beltza haiz

 eta heriotza ere beltza dun zurien begietara

 hire seme odolez mukuru zetozen

 inoiz urik ekarri ez duten ubideak

 hemen bihotza ez dun maitasunaren sinbolo

 gorpu anonimo baten oroigarri baino

       (eta hemen ez zegon kanposantu izango den

       estadio olinpikorik Sarajevon bezala)

 hemen jada ez dun haurrik jaiotzen ilargiaren argipean

 hemen jeranioak baino ez ditun sortzen

 hilotzek ondutako zelaietan

 puta bat bezala bortxatu hinduten burgesek

 eta puta bat bezala ahaztu

 gerria zabaldu eta bularrak zimeldu hintzaizkinanean

 eta zahartutako puta guztiei bezala

 drogak

       (semeen arteko borrokak)

 mingostuko dizkin heriotzerainoko azken urteak

 

Back to the root

 

 Harlem.

 Hemen umeek droga saltzen dute

 gurasoak mozkortu daitezen.

 Eta beren marrazkietan ez da inoiz

 eguzkirik ageri,

 hemen umeek patata artean baino

 ezin imajina dezakete oilasko bat.

 

 Harlem.

 Hemen inork ez daki

 kartera lapurtzen ari zaionaren izena.

 Paradisua drogan eta infernua kalean.

 Iruditzen zait

 hemen debekatua dagoela zoriontsu izatea.

 

 Harlem.

 Hemen eguzkia

 gasolina bidoietan baino ez da ikusten.

 Krak eta kokaina gauak.

 Abandonatutako pabilioietan

 sustrai beltzak kondenatzen dira ilunera

 inprobisatutako rap-etan.

 

 BACK TO THE ROOT

 

 Afrika ez dira seiehun milioi bakarrik.

 

 Afrikaz hitz egitea

 goseaz eta miseriaz hitz egitea da

 indarkeria eta bortxaketaz

 gerra zibila eta odol ixurketaz

 

 Afrikaz hitz egitea

 solidaritateaz hitz egitea da

 laguntasun eta misiolariez

 egoismo ala 0,7az

 

 Afrikaz hitz egitea

 debekatua dago Chicagoko kolonia beltzetan

 

 Afrikaz hitz egitea

 dokumentaletako elefanteez hitz egitea da

 basamortu eta pantera beltzez

 lehoi eta tribu gizajaleez

 

 Afrikaz hitz egitea

 heriotzaz hitz egitea da

 

 Baina Kinshasako Auzitegian

 langabetu batek trafikante baten kontra deklaratzen du

 

 


inprimatu