inprimatu
Lerro herdoilduak...
Izenburua:
Lerro herdoilduak...
Sinadura:
Garikoitz Berasaluze
Urkizaren iruzkina:
Egilea(k):
Berasaluze, Garikoitz

Argitalpena:
Susa.
Urtea:
1994
Argitalpenaren urtea:
Alea:
32.zk.
Orrialdea:
23

Garikoitz Berasaluze

 

Lerro herdoilduak

 

 Guk bakarrik maite har diezazkiokegu elkarri musuen apunteak

 nik zuhaitz guztiak fusilatuko ditut zure izena ez badute loratzen

 urtaro honetan ez da taxirik beharko amodioa mudatzeko

 eta nigarra zintzilikatuko nuke bakardadearen haga garratzean

 zu gabe

 hemezortzi urterekin mundua itzali ostean

 errepika genezake beste behin zuk nahi izanez gero

 zumardi baten desirazko habiei begira

 bihotzak deribatu eta maite haunat isiltasunaren koordenatuetan

 nikebai

 heriotzak banatzen gaituen arte baina hau ez da Bosnia

 ezta Camelot ere maite

 gaztelu itxuraldatuegia da egunerokotasuna ametsentzat

 beltza delako jipoitzen dute gaua mozkorrek

 opari diezazkiegun trenbideetako kokaina lerro herdoilduak

 baina guk ez dugu ohore aski zaldun izateko

 eta maitale izan gintezke etorkizunaren zirriborroetan idatzirik

 ikasiz ilargia moja zurbil bat dela gauaren abitua jantzita

 lainoak Ayatown ebakitzen duenean azaroaren aizkoraz

 jadanik ez dut behar elur gehiagorik nire poementzat

 eta guk bakarrik dakigu orain maite

 que os rios xa non orren pra ningures

 aspaldian galdu baitzituzten malkoak

 inork jakin gabe zergatik nos ollos teus

 guk bakarrik maite.

 

Sagardoaren plusbalia

 

 Jantzi dezala denborak pago biluztuen kapusaia

 eta udazkenaren kardiologian nabigatuko dugu

 itsaso eroriari hilotz, orbel hainbat bihotz.

 euriak gordeko du sumariopean gure aitormena

 sua ohi zen lekuan itsatsirik indriska,

 biok bildu eta besarkaden zenbakiz

 kalkulatuz gauaren estadistika.

 

 malkoen ilaunaz grafïtiak egiten harrapatu du amodioa

 portu zaharkituaren faroak rap desenfokatuan,

 gauak soineko berria lotu, zazpi ilargi zazpi botoi

 enkatuen arrabitek bemolean josia

 eta nabari dezaket aspaldian ez ote den zure begiena...

 

 botiletan sartu dizkigute

 kaio galduen lumaz margoturiko ametsak,

 olatuetan ur eman eta saldu

 zenbatzeko sagardo hustuaren plusbalia.

 eros dezagun lehenbaileben blai utziko gaituen askatasuna

 iristen bazaigu libra erdiren bat zaparradaren kanbioekin,

 zorionak ez baitu inoiz beste masaila eskaintzen.

 

 haizeak saratzen du izar odolgabeen ausentzia.

 gaur ez baitu irauliko katuen poema erromantikorik

 teilatuen odoletan igeri.

 

 


inprimatu