inprimatu
Iheslarien klubaren azken aholkuak bazkideei
Izenburua:
Iheslarien klubaren azken aholkuak bazkideei
Sinadura:
Andoni Tolosa
Urkizaren iruzkina:
Egilea(k):
Tolosa, Andoni

Argitalpena:
Susa.
Urtea:
1993
Argitalpenaren urtea:
Alea:
30.zk.
Orrialdea:
2

Iheslarien klubaren azken aholkuak bazkideei

 

Andoni Tolosa

 

 Geuk

 iheslariok

 harresien azpijoko guztietan sinesten dugunok

 berlin urratutako zafiroekin enbalsamatzea

 eskatzen dizugu

 behin mirestutako hirugarren gizonaren fotoa

 zuribeltzezkoa

 erretzea

 eta gure pasaporte faltsu guztiak

 sakrifikatzea

 etorkizun blindatuaren itsasmuturretan

 

 geuk

 mestizuok

 muga guztietan grafitiak idatzi ditugunok

 zera gogora arazi nahi dizugu

 grebara jo duela mugalarien sindikatuak

 mozorro eskasia dela eta

 (merkatu askatasuna)

 eta ilara luzeetan konfiskatzen dela

 etorkin apokrifo guztiek patriketan daramaten

 lur apurra

 

 geuk

 atzerritarrok

 herrimina dohaitzat eduki

 eta miserikordia etxeetan

 hiztegiak memoriaz ikasten ditugunok

 mespretxua eta geografia ez nahastea

 aholkatzen dizugu

 notarioak eta elkartasuna ez parekatzea

 arretarik ez jartzea mugagabetasunaren alde gramatikalean

 lodiagoak suertatzen baitira iparraldeko arkakosoak

 

 eta azkenik

 geuk

 iheslarien klubaren partaide orok

 ixilpeko iharduerari ekin diogula jakin arazi nahi dizugu

 erre egin dugula hil beilaren mapa

 seroren diplomazia saboteatu

 eta elurrez estali gibraltarreko radar logistikoa

 besteak beste

 

 hauxe izan da gure azken barne agiri publikoa

 hemendik aurrerakoak beste

 bideren batetik hel araziko dizkizugu

 

 deseuropako lekuren batetan 1993ko urtarrilaren batean

 

 


inprimatu