Amodio eta desamodioaren harietan irule
F.J. Mendiguren
I
Penelope
hel zakizkit
eta jostunen ofizio apala erakutsi
nola josten duten behatzek
sare harrapatzailea
nola askatzen duten gero
korapilo libraezina
egunez egindakoa
gauez desegiten
egunez ahaztutakoa
gauez berrikasten
II
Afrodita
jainkosa zaharra
zergatik eskatzen diozu horrenbeste sufrikario
zure erlijionean
iniziatu nahi duenari?
Isthar
atso zaharra
zertarako erre behar zaizu horrenbeste eskeintza
aldare gotor horretako
betiereko suan?
Astarte
puta zaharra
zer eskeintzen diezu zure meneko gaixoei
malkoizerdiodolezko
sakrifizioen ordain?
III
Julieta
zuk badakizu
eskailera erortzen
uzten baduzu
zurubian gora
igoko zaizuna
lehen floria
are bizia
ohostuko dizkizun
herio hotza
puinal zorrotza
izanen dela.
Julieta
huntzak ezin dio
igotzeari utzi
eta zuk ezin eutsi
amiltzeko agintzen dizun
barrengo abotsari.
IV
Bokila luzea
ezpain gorrietatik
apartatu eta
ke hari mehe luzea
aurpegira bota zenidanean
(A edo B)
A: lurrun urdinska
aidean galduz zihoan neurrian
burdinezko kate motz eta astun
bihurtu zitzaidan:
B: ene sorleku eta izena
ahantzi nituen eta
gauza bakarra jakin
aurrera begira:
zure nauzu betirako
Lili Marlen
Appendix: eranskin eta soberakina
(Ehungintzan beti izan dira litsak. Izan bezate lekua, behin batean
bederen, inolako jazkirik osatzera heldu ez diren eta zakarretarako izan ohi
diren litsok)
1.— Jeiki berria nahi zintuzket
Nagiak maindire arteko jolasean kendu, berrezarri
Zilborraren gau usainaz horditu
Bizkarraren loguraz pausatu, etzan
Larruazalaren zimurretan ametsen pusketak bildu
Begi ninietako ur zipriztinez aztoratu
Jeiki berria nahi zintuzket
Guzti horretarako
2.— Hedonista izanik
aszeta izanda
baldin zure behatzek
apur bat doi-doia
ukituko balute
nere haragia
eragingo luketen
zainetako zartak
buruko iletatik
hatzazaletara
larru azal guztia
dardara bizian
ipiniko lidake
nahitanahiezean
3.— Zure koloretea gorrixka da
eta masaileei sagar onduen eitea eman nahi die.
Koloretea duzu bigarren azala
axalekoa
zeren
koloreteak ez baititu nere muxuak maite
sentitzen ez dituelako eta
akabua dakarkiotelako.
Halaz guztiz ere
maite zaitut
koloreatuta ere.
4.— Anguloa sekula osatzera
Heltzen ez diren bi lerroren
Arteko bisektriza ezarri
Nahian nabil baina ezin
Bertiza bilatu eta
Segmentuek bat egin arte
5.— Buzoian
olbidoaren armiarma
hiloihala fruten ari
harategi berriko prezio merkeen propagandaz
Telefonoz
urrutiko izkinatik
entzundako tutu erritmikoak
kiriobera bihurtzen hezurmuinak oro
Aurrez aurre
begitarte hieratikoaren
mustapil izoztuetan irakurri
azken sententzia apelaezina: ene suizidioa
6.— Neronen sentimenduen
aktore txar eta erridikuloa
besterik ez nintzen.
Komedia bera ere
zaharra, betikoa, ezagunegia
—nere adaptazioa benetan kaxkarra—.
Zuzendaritza lana
tamala, negargarria
—zer zuzenduko nion bada nere buruari?—.
Nīk tristearena egiten nuen
baina, egia aitortu behar badizuet,
oso triste nengoen.
7.— Taberna zikin bateko
lababoko ispiluan
karminez idatzi nizun
azken mezu izkutua.
