_

Itxas-ertzetako kontuak

Basarri

 Kantari nator, anai arrebak,

 oitua bainaiz ongi len,

 Ta " Gernika'ren " zuzendariak

 orretxen zale baiziren.

 Bertso batzutan azaldu nai dut

 al nezakenik garbien.,

 Euskalerriko itxas-ertzetan,

 jendea nola dabillen.

 Zoaz ondartza batera gaur da

 zaude bertan une baten

 Zure begiei lan pixkat eman

 zerbait ikusi dezaten;

 ondorenean, ni bezelaxe,

 asiko zera esaten,

 Oso xamurra ez dela orain

 kristau zuzenak izaten.

 Orra neskatxa jostalariak,

 ildako griñak pizteko,

 Oial bearrik "apenas"duten

 beren gorputzak jazteko.

 Berak bakarrik naikoa dira

 zuzentxoenak nasteko

 Ezpaitaukate kazka ta lotsik

 dutena erakusteko.

 Emakumeak nola baitauden

 zabarkerira emanak,

 Arrixku-bide aunditan gabiltz

 gu, gizonezko geranak;

 bixtara azaltzen badizkitzute

 gordean bear diranak,

 Zirikaldia seguru dauka

 marmolezkoa ez danak.

 Billuzkeria maite dun batek

 geiago ezin eskatu,

 Ortik aurrera bide askoan

 ezin leizke arrixkatu,

 Argi daudenak itxutzen dira;

 lotan dauenak esnatu,

 Gizonezkoak inguratzeko

 ez dakite zer asmatu.

 Gau eguneko emakumeak,

 zer asmo klase dakarte?

 Dituzten sallak erakusteko

 zaletasuna daukate.

 Billuzkeria gauz zatarra da,

 orretan oker zaudete

 Neurri batean errendituta

 ederragoak zerate.

 Gaur gaztetasun osoan eta

 biar ba-goaz gainbera.

 Zerbait gerala uste degu-ta

 utsaren urrengo gera.

 Naiz eta orain dituzutenak

 bixtara pozik atera...

 Etzerate aiñ arro izango

 ¡emendik ogei urtera!

 Gorputza baldar; illeag zuri;

 alde guzitik galeran,

 Garai bateko eguzki printzak

 illunpetako sarreran;

 Iñork ez digu begiratuko

 jarriaren lengo eran,

 Ortatik pentsa bear genduke

 arrotzeko gu zer geran.

                                                               Zarautz-Dagonilla