a)Ez da hotzik, baina eskuak sakeletan daramazkizue. Oinez zoazte, edozertaz
hitzeginez, lurrari beha zihurki. Ibiltzearen balantza eskasean, zuen
ukondoak igurtzi egiten dira ukitu erotiko batetan. Ikastaro luze baten atarian
zaude, eta lehen ariketa horrek «bertizeen musu zoroa» du izena.
b) Zigarro bat ateratzen duzu, ah barkatu, ez naiz konturatu, nahi ahal
duzu, ez, ez du erretzen, baina sua eskaintzen dizu, eta haizearen aitzakitan
zeureetan biltzen dizkiozu eskuak. «Biligarroen habia» egin berria duzu.
d) Ipuin banal bat kontatzera zoaz, ezagunen baten konturen bat, hitzen
ezin asmatze tentsoa hausteko zozokeriaren bat, ba ahal dakizu, orain hemendik
pasatzerakoan gogoratu naiz, eta aldi berean hurbilago duzun bizkarrean eskua
ipinten diozu memento batez, irrifar eginez. Hirugarren lege honi «elurrezko
hatzaparraren hotzikara» deritza.
a) Ezpaloiko karratuak, hurrengo hilera pasatzean, ez hurrengoa, noiz
arte luzatu behar duzu, hurrengo hilera pasatzean, noiz bestela, zergatik ez
zaio gustatuko ba, orain, horratx, ez da ezer gertatu, lurrerantz behatu du,
eta ez du ezer esan eskua beste aldeko bizkarrean xamurki ezarri diozunean.
«Ilunabarretako ibilaldia» oso arrunta da, eta aterkiperako txit egokia.
b) Eskuak, eskuak, inork ez zaitue ezagutzen, inork ikusiko ez bazintue
bezala izanen da, eskuak, berak ez du indarrik eginen, eta zer ari zaren
kontura ez dadin egiozu galderaren bat, nolako hatz luzeak dituen. «Usoen
hegala isila» bezala ezagutzen den praktika hau gazteen artekoa da, eta
Mahadeva-ren legedian guztiz debekatua dago agure-atsoentzat eta eskuetatik
izerditzen direnentzat.
d) Isilik, oso isilik, eskua besotik pasa dizu. Gehienbat bikote
helduen artean erabiltzen den «esku eroriaren uztartzea» gazteetan
legitimatzeko, burua Mutilaren bizkarrean jarri behar du neskak. Egun, tamalez,
oso utzia dagoen praktika da, feministek gizonaren boterearen ezaugarritzat edo
hartzen dutelarik.
a) Eskuak patriketan edo atzean gurutzatuak dituela, besoa urrunago
duen besoraino luzatuta bueltaturik, esku ahurraz hartzen diozu besoa. «Uhin
apartsuaren lotura».
b) «Uso zuriaren ehiza»: beste aldeko eskuaz alkandoraren lepoarekin
ari da jostatzen, eta besoaz bizkarra inguraturik eskuan harrapatu duzu berea.
d) «Usoen hegada isila»-ren bereizkuntza, eskutik hartzean besoa
doblatu eta bere gerriaren beste alderaino eramaten dizu. Ariketa honi «besoak
elkar gainka» esaten zaio, eta zenbait lekutan, Urola aldean batez ere,
«gerrialdeko triangulua» ere bai.
a) Eskua beste aldeko bizkarrean ipini diozu, eta besteak, gerria
inguratzen dizu besoaz. Halakoetan komenigarria izaten da beso libreaz eskua
har diezaiozun. Azken fasea urratu duzu «lorategietako korapiloa»-z.
b) Gerriak elkarri inguratzen dizkiozuenean, «gurutzearen korapiloa»
egiten duzue. Praktika hau, maiz askotan, uztartze sakonagoren ataria izan ohi
da.
d) Esku ahurraz besoa elkarri hartzen diozuenean «uhin apartsuen lotura
bikoitza» ari zarete egiten, edo eta, Vatsyayana zaharrak dioen bezala,
«sugearen besarkada».