inprimatu
Izarren hautsa
Izenburua:
Izarren hautsa
Sinadura:
Xabier Lete
Urkizaren iruzkina:
Egilea(k):
Lete, Xabier

Argitalpena:
Vladimir.
Urtea:
1998
Argitalpenaren urtea:
Alea:
11.zk.
Orrialdea:
4-5

 

Izarren hautsa

 

Xabier Lete

 

 Izarren hautsa egun batean

 bilakatu zen bizigai,

 hauts hartatikan uste gabean

 noizpait ginaden gu ernai.

 Eta horrela bizitzen gera

 sortuz ta sortuz gure aukera

 atsedenik hartu gabe:

 lana eginaz goaz aurrera

 kate horretan denok batera

 gogorki loturik gaude.

 

 Gizonak badu inguru latz bat

 menperatzeko premia,

 burruka hortan bizi da eta

 hori du bere egia.

 Ekin ta ekin bilatzen ditu

 saiatze hortan ezin gelditu,

 jakintza eta argia:

 bide ilunak nekez aurkitu

 lege berriak noizbait erditu

 hortan jokatuz bizia.

 

 Gizonen lana jakintza dugu;

 ezagutuz aldatzea,

 naturarekin bat izan eta

 harremanetan sartzea.

 

 Eta indarrak ongi errotuz

 gure sustraiak lurrari lotuz

 bertatikan irautea:

 ezaren gudaz baietza sortuz

 ukazioa legetzat hartuz

 beti aurrera joatea.

 Ez dadukanak ongi ohi daki

 eukitzea zer den ona,

 bere premiak bete nahian

 beti bizi da gizona.

 

 Gu ere zerbait bagera eta

 gauden tokitik hemendik bertan

 saia gaitezen ikusten:

 amets eroak baztertuz bertan

 sasi zikiņak behingo erreta

 bide on bat aukeratzen.

 

 Gu sortu ginen enbor beretik

 sortuko dira besteak

 borroka hortan iraungo duten

 zuhaitz ardaska gazteak.

 Beren aukeren jabe eraikiz

 ta erortzean berriro jakiz

 ibiltzen joan direnak:

 gertakizunen indar ta argiz

 gure ametsa arrazoi garbiz

 egiaztatuko dutenak.

 

 


inprimatu