Udazkenez

Xabier Kintana

 Eta ba doaz egutegiko horbelak

 haizeaz hegaka, udazkenean,

 eta ene zaldi behiala beltza

 zuritzen hasia da.

 Eguzki eder gorria,

 urre bizi suzkoa,

 ez hadi, otoi, itsasora!

 Ardantzetan,

 oraindik biltzeko,

 mahats ugari baitago

 eta galburuen gainean dugu

 kantuz oraino,

 maitasun-txoria.

 Edan dezagun lehenik,

 ditzagun huts geure ontziak,

 ez gaitzan gauak eraman

 lotara baraurikan.