Gernikako haritza

William Wordsworth

euskaratzailea: Jesus A. Etxezarraga

 Gernikako haritza! Dodonakoa baino arbola

 Indar sainduagokoa, zeinak baitan ei zuen

 (Fede sineskoiak hala uste zuenez) jainkozko boza,

 Bere aire adar basotik entzunarazten zena.

 Zelan loratu zinen ordumortu haietan?

 Zer itxaropen, zer poz ekar ziezazukeen eki izpiak?

 Edo Atlantikotik heldutako itsasaize eztiak,

 Goizeko ihintzak, edo Apirileko euri bigunak?

 Kolpe errukitsu ta ongi etorria litzateke

 Zure adarrak lurrera apalduko lituzkeena,

 Ezpalira sekula zure itzalpe borobilean

 Goi asmoko lege emaile horiek berriz bilduko,

 Nekazari ta jaunak, euren jarleku izendatuetan,

 Bizkaiko libertate zaharraren jagoleak.