Camemberg guria

Paul Meabe

 Dendetako dependientek edozeri baino beldur gehio die

 negu arrastiritako azken orduei,

 dagoeneko gau zerratua kale artean

 eta 50 urteko filma amerikanoen sikosi hori.

 Bazkalondoan Hamletarren kofradiako

 tertulian egona nintzen,

 ondoren alkimiara eskeini nuen aldi bat

 eta baitere zentzugabeko frase batzu grabatu parkeko bankuetan,

 beste hainbat udal zaramaontzietara bota nuen.

 Derrefentean fraseen eragina

 dependienta koitatu batengan frogagura sartu zitzaidan.

 Kalea pasa eta gaztadenda batetara sartzea baino ez neukan.

 Neskamea apaleriaren kontra hartuta

 fraseen pozoia txertatzen hasi nintzaion:

 "mundu osoko hareatzetan barrena,

 ekiaren ezpata gartsua persekutatzaile,

 ilundurako erreinuetarantz enmigratuz habil,

 narras hoa,

 lur loa,

 hutsaren ondorena falta zain

 daramanan alanbikea hautsi dakianan;

 seinale bat dakusan mendebalera

 bere arrastoan gatza uzten duena,

 heure odola dun arreba, heurea

 haren baitan maria gora maria behera dabilena,

 egunero egunero goizaldera ozpindua geratzen dena;

 berbaren batzu diosan grekeraz,

 hona hemen iretargiaren otsaina edo;

 amesetan eta lotan hagonala zeinu urtsu batek

 zer ordu den jakinerazten din

 eta zera gehitzen,

 jagi hadi ohantze hortarik,

 jaio, ezkontz eta herio ohantzetik;

 bai, badatorkin, orain hasi haiz konturatzen ongi,

 banpiro zurbila bailitza,

 gaueko nabigante bakarra heugana datorrela,

 zuzen zuzenean heure ahoari azken kaztana lapurtzera;

 ez egion uka,

 emaion eta ikuituaren mementu berean hi haizena ezaba dadila

 hire ezpainetan"

 Zerbait jazo zen derriorrez,

 ezen irteeran andra baten otsaran nindoan camemberg guria bainintzen.

 Eta . . . . . . . . . . . . zertan segi.