Alegia berri bat

Zubiria, Jean Pierre (Panpilli)

 1

 Oilarrak zakurrari: «Oi, adixkidia,

 Haizu dea laguntza hiri galdazia?

 Oilo zahar gaztetan diat desmasia,

 Aintxu hustua baita en' oilotegia.»

 2

 Zakurrak errepusta hauxe egin dio:

 «Zerbitzu egitia ez diat hastio

 Mundu huntain bakotxak bere ofizio:

 Ni hemen jarria nauk denen gomendio.»

 3

 - «Martxant gaxto bat baduk hunat eldu dena,

 Kaxkarot hoietarik, oihu ta marruma:

 Etxeko andriaikin dik zerbeit kombina,

 Oilokiz asetzeko trukatuz arraina.»

 4

 - «Pen haundikin diat nik hoi konprenitzen,

 Lagunk hola galduz zer penetan haizen!

 Martxant hoi berritz hunat delarik etortzen,

 Segura jakinen dik ni hemen nor naizen.»

 5

 - «Adixkide maitia, konpreni zak ontsa:

 Hauxe egin behar duk gure seinaletza:

 Ikus orduko inzak saingaldi bat gaitza,

 Ene lagun hoiekin gorde gaiten ontsa.»

 6

 - «Oilar maitia, otoi, kondazak bai nitan.

 Seinale izanen duk hoi ene sangetan.

 Ongi gorde zaitezte urrun landa hoitan:

 Hutsik gan beharko dik horrek aldi huntan.»

 7

 - «Erran bezala beraz ta ikusi arte,

 Laguneri behaiat orai eman parte:

 Oilotegia badugu salbatzen holaxe,

 Saritzat izanen tuk segur bi arroltze.»

 8

 - «Hi hemen oilar eta ni berritz zakurra:

 Kontseilu bat nik daiat emanen zuhurra:

 Norbeit hasten denian oihuz «purra purra»,

 Etzaiteztela mugi zeren den gezurra.»

 9

 Zakurrak itzemana zuela atxiki,

 Horren arribatzian saingatuz bortizki;

 Ez baitzaion iduri hoi bazela aski,

 Giheletikan zion zangarra ausiki.

 10

 Andreak oilueri oihu eta oihu.

 Egun hartan battore nihundik ez eldu,

 Ezin konprenitu du norat ziren galdu:

 «Zer bilakatu dira oi zer mila debru!»

 11

 Martxanta kexatua, oilorik nihun ez;

 Zakurrak ausikia, zangarretik minez;

 Furian partitu zen samurtua zinez,

 Etzela berriz jinen juramentu inez.