Fruitu berriak ematen
Apaolaza, Martin
1
Gure Euskal Herri berdin gabea
Nik zenbat maite dedan
Mingainez ezin nezake esan
Bihotzak nahi duen eran.
Kanpotiar den jende guziak
Honuntza datozte egan
Zu baino xoko politagorik
Munduak ez du beregan.
2
Askok eztaki Euskal Herriak
Hainbat alderdi daukanik
Bestek ez ditun edertasunik
Guk gurekin genduzkenik.
Mundu guzia korritu ez arren
Segurtamenak dauzkat nik
Behin ikustean nehor ez dela
Hontaz gustatzen ez denik.
3
Mundu guzian ezaguna da
Lur goxo hunen izena,
Nik ez dut uste gezurra denik
Esaten ari naizena.
Zu zera gure bizi lekutzat
Jaunak egin zinuzena
Zure lur pollit maitagarria
Ba gu hazi ginuzena.
4
Jaunak bizitzen utziko balu
Batek nahi duen hainbeste
Euskal Herrian urte andana
Gustora pasa litezke.
Nehora ezin liteke joan
Leku hobearen eske
Lur eder huntan sortu ginanak
Kontentu egon gintezke.
5
Euskal Herria ari da beti
Fruitu berriak ematen
Jarraitzaileak behar baitira
Holako lur eder baten.
Ez dakit eta ni ezin hasi
Zerua zer dan esaten
Baina hark ere zail izanen du
Hau baino hobe izaten.