Katalin Errotako (Ipuña)
Abeletxe
Katalin Errotako ¡ura neskatilla!
Ardatza lez zuzena, garbi ta langille
Soñez liraña zenun, arpei biribilla
Bi senar-gai zebiltzan biotz orren billa.
Zapataria bata, baserritar bestea
Kataliñi sortuaz milla buru-auste
Bi mutillak zenitun lerden eta gazte
«Kuttun au neretzat da», biak zuten uste.
Zapataria juan zan arratsalde baten
«Kataliñ, maite zaitut», arrenka esaten
»Zurekin ezkon nai det, ezkondu lenbailen
»Zure ondoan beti, eztiz bizi naiten.
»Ezkonduko ba'ziña, ezkondu nerekin
»Señorita zindekez, zapal berriekin
»Jantzi ere sedazkoz, eun apañekin
»Ezkondu zaite ezkon, zapatariakin.
-»Eskartzen dizut Krispin, zure gogo ederra
»Baña gogo on ortan etzara bakarra.
-»Aitu det bai Kataliñ, berri oso txarra
»Zu lortu nairik dala, Yon baserritarra
»Aien etxean ba'da, sasia ta larra
»Galduko zera arekin ezkontzen ba'zera.
»Baserriko lana, lantxu makurra
»Udaldietan bero, neguan egurra
»Bero danean urri iturrian ura
»Otz dagonean berriz, mendian egurra.
»Katalintxu, maite det zure begi-ertza
»Gerria mea dezu, bular aberatsa
»Ezpain lodiak eta guria okotza
»Zoriona diteke zurekin ezkontza.
-»Zaude ixilik Krispin, izan zazu lotsa.
-»Katalin Katalintxu, nere neska-montza
»Zu ikusita pil-pil jartzen zait biotza
»Etzaitut iraindu nai, nik ba'daukat lotsa.
-»Lotsa baldin ba'dezu, ez zazula galdu
»Gizonak bearreko, ori izaten du
»Ezkon-itzarentzako, nik ez det berandu
»Senar-gairik oraindik eztot aukeratu.
Urrengo arrastian, norbait errotarantz
Nekazaria dezu, eman diogu antz
Oñetan abarketak, buruan txapel baltz
Yon'en irudimenak, Kataliñ dau baratz.
Fi-fi-fi txistuetan, erdi kantaria
Errot-inguroan da Yon nekazaria
Biotza taupa-taupa, Klan-klan errotia
Dan-dan jo dautzu eskuz, boluko atia.
«Kirrink» entzun ondoren, atia, ideki
Katalin an agertu begi urdiñekin
«Zeu al ziñen Yontxu?» berak galde egin
»Zatoz sukalderaño, zatoz gaur nerekin
»Itz-ein bearra degu biok alkarrekin.
-»Kezkaz natortzu kezkaz ¡oi ene Katalin!
»Ames-txarra izan det zapatariakin.
-»Bakizu, zapatarik, astelenean jai
»Emen izan zan atzo, itz-ematea nai
»Jakin zazu nintzala, zure berrien zai
»Exeri zaite emen, su-ondoan lasai.
-»Zapatari alua, alu ta mamua
»Erdizka be eztaki bere opisiua
»Bakit izan nintzala atzo iraindua
»Bearko dida eman, esplikasiua.
»Ori beti izan da oso txorroskillo
»Emakumekin ollar, gizonekin ollo
»Arrapatutzen ba det, aitu zazu ondo
»Eztu bizkar-aldean otsik eramango.
-»Baretu zaite Yontxu, esamesak utzi
»Aintzakotzat artzea, eztau ba meresi
»Biok mintzauko gera maiteki-maiteki
»Exeri zaite emen, exeri, exeri.
-»Nere maite, nere kuttun, biotzeko zatia
»Nere mingoztasun danen ezti xoragarria.
-»Zer nai dezu yan Yontxu, txistor ta arrautza?
»Ardautxoa be ba'det, baita piper-saltsa.
-»Kataliñ Katalintxu ¡ori da eskintza!
»Aingeru bat zera zu, maitetxo biotza
»Nere bekeketxua, zeruko bildotsa
»Nere udaberria, Pasko-jai mokotsa.
Jarduna ortan dala, atean «dan dan dan»
-»Irin billa da norbait, ikus zazu nor dan
-»Bezeroren bat degu, serbitu dezadan
»Bitartean zuk lasai, ardo pizkat edan.
Koxe Etxezarreta zenun bezeroa
Kataliñi galdezka iriñan sentsoa
Kobratu dio eta kargatu asta
Ereman dezan ezkar etxera zorroa.
Kataliñ'ek bukatu doanean lana
Sukaldera dijoa mutillarengana
Arritu da neskea? zer da ikus dauna?
Yon lotan aurkitu da, murgildurik dana.
-«Gaxoa!» -dio neskak- nekatu da antza
»Baserriko nekea beti dezu latza
»Zer bear det egin? itxar arazi?
»Atseden artu dezan lo-zorroan utzi?
Onetan trumoi-otsa asi borron bon bon
Euri zaparradari taju dio emon
Kataliñ urduri da, ezin geldi egon
Oñaztua berriz be, berriz borron bon bon.
Trumoi ortan zaratak mutilla itxartu
Diñotsola neskari «parkatu, parkatu»
»Abarrots-andi, oneik naute ikaratu
»Lotsa naiz Katalintxu zer zaigu gertatu?
»Egoaldi sargoriak odeiak moltsotu
»Trumoiak moltso oiek egoki zulatu
»Zuluotatik ura gozo abiatu
»Euri-zaparradea ¿eztozu asmatu?
-»Euri zaparradea? ¡Jaungoiko laztana!
»Ezta makala nere aberastasuna
»Euri-tanta bakotxa, euritxu biguna
Ez al dakizu maite, urrea deguna?
-»Nola diteke ura urre-gorri izan
»ez zazula Yontxu itz-arolik esan.
-»Euria urre dezu nere baratzetan
»Landarak suspertzen dauz baita soloetan
»Lorak garau biurtzen gure zugatzetan
»Sentsunez ari nazu, ez naiz amesetan.
-»Gaurko zure jarduna aitzen nago gogoz
»Antza, ikasi dezu zerbait pilosopoz
»Atzo ez nuan izan gaur detan aña poz
»Ark eztaki esaten alakorik iñoz.
-»Egia da Kataliñ, baserrira zatoz
»Kutxak beteak dira baba-gari-artoz
»Orain uzta berriak itxaroten gagoz
»Baserrian lotan be irabazten zagoz.
-»Yontxu, nere asmoa, dalako burutu
»Orain berri txiki bat jakin bear dezu
»Aitu zazu arretaz, arretaz aitizu
»Ezkontzea pentsau det ¿ez al dakizu?
-»¡Kataliñ Kataliñtxu, Kataliñ Kataliñ!
Norekin pentsau dezu, zapatariakin?
-»¡Zer zapatari ta zapatari oste!
»Baserritarra beste iñor eztot maite;
»Senar izango zera, ni zure emazte
»Seme-alabak aziz, Goikoak nai beste.
-»Milla aldiz bedeinka dezadan Birgiña
»Aitu dau eskaria, nik otoitz egiña
»Pozaren po-po-pozez, ene Kataliña
»Zer esan be eztakit, lotu zait mingaña.
-»Erabagita bedi, ezkontza gaur berton
»Aide ta laguneri, berri ori emon
»Orain zoaz etxera, ene maitetxu Yon
»Mosu bat ekatzu ta... biar arte: Gabon.
Neskatillaren itzak; mutillan mosuak
Azkar ekarri ditu, ondoren gozuak
Goizeon ikus ditut, gure txoritxuak
Altaran zapi-zuriz, alkar buztartuak.
Ondoren eleizatik irten ezkonduak
Apaiza be eurekin, baita gurasuak
Etxerantza dijoaz alkartuz besuak
Atzetik lagunduaz baserri osuak.
Larragoiti'ko salan bazkaria gertu
Janarien usañak, zudurrak ikutu
Ikutuak denei, agiñak zorroztu
«Yesar zaitezte denok!» norbaitek agindu.
Yesarri dire laster, lagun-adiskide
Apaiz, ezkonberri ta berrogei senide
Senditarte ederra! Larogei maikide!
Guziak irripanez, atsegiñez dire.
Janari-edariak mai ganen bilduta
Maikideak pozarren eureri agurka
Apaiz-ezkontzaleak maya bedeinkauta
Den-denak asi dute ixixilik mauka.
Salda, barbantzu eta oliozko aza
Lukainka-urdaiakin ederki da pasa
Ondoren makallaua, perde-perde saltsa
Naiago dutenentzat, prijituz lebatza.
Arkume ta ollazko, ori-ori gantza
Gatzatu, sagar-umel, mordoetan matsa.
Ixil asi diranak, borborrez mintzatzen
Botillaren klon-klona, ezpaita ixiltzen
Noe'k asmatutako ardoaz bizitzen
Iñor eztago motel, guziak kantatzen:
»Ezkonberriak pozkiro daude
»Egin diradelako alkarren jaube
»Eleizan
»Gauza ederragorik ezin izan
»Oi neu erec ba'nengo oyen gisan!
Kapia artu dabe, anix eta koñak
Gizonak bai piztu beke-belar bikaiñak
Arin dira len aztun ziraden mingañak
Burranda ateratzen du, guzien ekiñak.
Gazte bieri denak, zerbait esan-gura
Zirika ari dira atso ta agura
Ezkonberri oyeri ez baña ardura
Alkarri begituaz, irtetzen adurra.
Denak zutitu ditu tanbolin-txistuak
Aupa ta irrintzika aidean zankuak
Asele-esakerak, baita be bertsuak
Ondorenean berriz pozezko kantuak.
Guziak asi dute irriparreakin
Kantatxu ezaguna, arrasoiarekin:
»Onela biziko bagiña beti
»Ondo giñake Kataliñ.
***
Orain ba'doaz denak etxaunan aginduz
Lurraldeak ikusten bularrak axetuz
Muna ta landetatik kir-kir kanta aituz
Baratz eta soloak gozaro begituz.
Gariak ebagita iretaian kontuz
Artoak burututa, bizarrak agertuz
Arta-kirten guziak babaz inguratuz
Arnari-zugatz denak, adarrak makurtuz.
Ba'da antxe sagarra, ba'da madaria
Ba'da okarana-ta, ba'da mertxikia
Baratzetan be ba'da, aza-kipulia
Lekatan ezta gutxi, piper-sail andia.
Etxalde arentzako ba da goralmena
Norbaitek ein du antxe, egin du bai lana
Orain salarantz doaz, ikusirik dana
Eguzkia be juan da bere amagana.
Illunabarra dezu, illuntza gozua
Urbiltzen asi iatzu, joateko ordua
Ixkitxu bat yan-eta, zurrutauz ardua
Banan-banan aldetzen, jentia ba'dua.
Ezkonberri gazteak dira leioratu
Azkenak agurtzeko, besoak luzatu
Gaba ganean degu, illuna jaubetu.
Ezkontzale guziak dira aienatu.
Zerua garbi dago, ez odei ez lañu
Urrunean aitzen da tanboliñan doñu
Urretxindorrak ere txorrotxio ein du
Ontza berriz ixil da, es nai iñor mindu.
Atadian aurrean saltari erreka
Ibil-aztera doa bean dan errota
Ortzean illargia agertu barreka
Artopilla dirudi labean erreta
Barrena daramala erleztiz beteta.
Ixiltasun sakonak basoa baketu
Guziak juan dira-ta, bakarrik geratu
Ezkonberri gazteak, alkarri begitu
Leioa itxi dute, euren gelaratu;
Ipuña bukatu da, dezagun kantatu:
»Zorioneko ezkonberriak
»Orla ikusten ditut zuen begiak
»Pil pil pil
»Mingaña ixil, biotzak itz-egin
»Lo pizkatxoren bat nai dute egin.