Nafarroa
Zapirain, Jose
1
Mendi eta herribehera
gaztain eta mahatsa;
malda eta zelaia
oliba eta sahatsa.
Nafarrak bi lekutan
bat bera du atsa,
mugatik mugaraino
Euskadiko arnasa.
2
Ez dira bi Nafarro,
biak dira bata,
mendi eta zelaia
nonahitik hasita.
Nafar herri berdina
goi te behe jirata.
Ez ditzagun zatitu
biak bat dirata.
3
Hizkuntza bat zuten lehen,
mingain eta burun,
Ez zegoen erdararik
Nafarraren zerun.
Erregeen hizkuntza
ez bazuten iraul,
orain ere izango zen
Lingua Navarrorum.
4
Zelaian gaur ordea,
hizkuntza galdu da,
erdarak ez du irentsi
oraindikan malda.
Erderak sopindu du
mahatsaren salda.
Gaur Herribehera herri
tristea ez ahal da?
5
Non dago erreinua
non dago Nafarra?
Non dago historia
Erregen indarra?
Betidanik lur harten
sortutzen zen garra?
Euskalerriak badu
guztion beharra!
6
Gure herri zaharrenari
Nafarroa deritza,
handik lehen zetorkigun
aberri bizitza.
Orain mututu zaigu,
galdua du hitza.
Ai berpiztuko balitz
Eneko Haritza!
7
Erakust apalean
gorderikan lantza,
galdu al du Nafarroak
geroko esperantza?
Altxa zazu burua
pasa da gau latza.
Ez ahaztu zu zarela
Euskadiko ardetza.
8
Aralarko mendian
hautsita kateak,
Ireki aberriari
Ireki ateak.
Gogoratu berriro
"Harritzan" urteek,
gorda Nafarroaren
betiko legeak!
9
Zenbat etsaien kontra
zinen borrokatu,
banan-banan zenitun
denak menderatu.
Baina azkenik erdarak
zaitu azpiratu.
Ez ote duzu nahi
berriro askatu?
10
Pago, haritz, urkia
gaztain eta urra.
Mahats oliba makala
Erribehera lurra.
Gari, ardo, artoa
piku eta intxaurra:
Nor da askatasuna
kendu dun lapurra?
11
Mahatsondok dituela
nonahitik inguruan,
gordeleku zahartzat
aspaldiko muruk.
Hura du Euskalerriak,
ametsezko helburu,
Iruinea bakarrik
bere herriburu!
12
Iruinea lur gozoan,
sarturik zuztarrak,
zazpi porbintzietara
zabalduz adarrak.
Baturik muin batetan
guztion indarrak.
Desegingo ditugu
kartzelako barrak.
13
Entzun Aralarretik
Mikelen orroa,
Lehen izan zaren herri
nagusi arroa!
Hantxe gara gu denak,
Han dugu erroa.
Herririk handiena
zara Nafarroa!
14
Zu zara trumoi, tximist,
zu zara ortzadarra.
Ekaitza eta enbata,
zelai ta malkarra.
Leize zulo zara zu,
ederrez bakarra.
Hitz bateten esanda:
Zu zara NAFARRA!
|