Lagun zaiegun!
Ataño
-1-
Gazte bi il ziran Asturias'ko
mendi arkaitza batean,
laister zabaldu zan berri txar au
Euskalerriko partean.
Gaizki-esaka jardun diranak
ere ba-dira tartean,
naiko zoritxar berekin dute;
utzi zaiegun parean,
oraintxe bertan jo bailezake
negarrak gure artean.
-2-
Tabernazulo danetan sartuz,
borondaterik gabeak,
lanetik iges, erdi berdotzak,
eta tripazai, jaleak.
Gorputzaren atsegiña baizik
maite ez duten abereak,
bizitz guri ta nagi, alperrak,
bizio txarren jabeak,
oiek al dira Euskalerrian
bear ditugun gazteak?
-3-
Emateko motx, artzeko luze,
aurrelari ta lapurra,
izaia bezin odolzalea,
diru pillatzalle zurra.
Iñoren onak biotzean min
ematen dion maltzurra;
besteren gaitzak kezkatzen ez dun
urko maitale laburra,
olako gazte oiek jasoko
ote dute gure lurra?
-4-
Erromatarrak indartsu ziran;
lur geienaren jabeak,
bere gazteak uzteldu ziran;
Erroma'k bere goi-beak.
Zoritxarrez gaur geiegi dira
aul da kemenik gabeak,
beren erria maitatzeko-re
gauza ez diran gazteak,
olek ugaltzen asten badira
laister egin du gureak!
-5-
Bere morralla bizkarrean da
erbia bezin zaulia,
ala dijoa aldapak gora;
maitatzen baitu mendia.
Ikusirik gaiñ artatik zeiñen
ederra dan aberria.
Zaill ezi eta oitu gorputza:
sendo, ta burua argia,
orixe da gaur Euskalerriak
eskatzen dun gaztedia.
-6-
Ezpaziran joan etziran ilko;
ori ere entzuna nago,
gazte batzuen jolas garbiak
ezin juzga gaizkiago.
Batzuek lotan, besteak jaten,
gelditzen dira «zerraldo»;
ez du pasako bere neurritik
segundo-erdi geiago,
gizonarentzat lur ontan leku
seguru ori nun dago?
-7-
Itxaso, mendi, kale, taberna,
arrixku txarra danetan,
konta-errezak dira oso, il
diranak mendi gañetan.
Gazteak dira, odol beroa
daramatenak zañetan,
mutill kamentsu oien joera
erakusbide benetan,
dirurik gabe pausorik eman
nai ez dan garai auetan.
-8-
Aiek bezela euskaldun gera,
fedea degun gizonak,
biotz on baten poz, atsegiña,
nai du negarrez dagonak.
Ez pillatuta erdoitzen jarri;
zabaldu zuen txanponak,
anai bezela maita gaitezen,
ez du balio «Or Konpon'ak»,
danon artean jasoz alkarren
zoritxar da zorionak.
-9-
Aiek joan ziran; beren etxetan
nabari dute utsuna,
aurtxo batekin beartsu xamar
dago baten alarguna.
Biotz-biotzez lagun zaiegun:
erruki ta maitasuna,
ori da gure Jainkoak gaur da
beti eskatzen diguna,
gaizki-esakak utzita izan
esku-zabal, euskalduna.