Haziendari deklaratu beharra

Zaldubi

 Lapurrak lapurtzen du

 beharra duelako,

 gose daukalako,

 bainan ez inoletan

 alferra delako,

 giro pobre batetan

 jaio zelako,

 beste irtenbideak

 moztu zaizkiolako,

 eta haziendak berriz

 gose dagolako.

 Lehenago gutti hartuta

 orain gehiago nahi,

 ezkurrari jarrai;

 denen aurrean joaz

 soinu eta kanpai;

 lapur ttikiak daude

 kartzelan lizungai,

 bitartean haundiena

 kanpotikan lasai,

 beraz nonbratzen dut hau

 lapur denen artzai

 Zerri goseak beti

 ezkurretan amets,

 al badeza irentsi

 ta bere grina hori

 ez daiteke sinets,

 inolaz ezin bete,

 bere hainbat saihets,

 dena bukatu arte

 ezin du erdiets,

 zerririk haundiena

 hazienda baietz!

 Dirua aisa lortu

 ta lepoa lodi,

 «errez etor bedi»,

 hortarako badute

 hainbeste legedi,

 ta ez dute botatzen

 behar hainbat izerdi,

 ondoren ezkutatu

 maiz zenbait alderdi,

 agertuz ehunetik

 hamazazpi t'erdi.

 Euskal Herritik doa

 horrenbeste diru,

 ezin esan klaru,

 hamar eraman eta

 bueltan dator hiru,

 bidean galdutzen da

 hainbeste kopuru,

 beraz gure herriak

 ez dauka asturu,

 ta gure etorkizuna

 ez dago seguru.

 Diruarena ez da

 oraingo musika

 eta politika;

 eramanak dituzte

 hemendik hamaika,

 eta handik zer dator?

 jipoia milaka,

 beti ibili behar

 kalean korrika,

 eta herriak dirudi,

 Pikason «Gernika»

 Poliziak milaka

 gainera tanketak

 baita eskopetak,

 diruak eramanda

 ekarri pelotak,

 dohainik dakartzate

 keak ta zaratak,

 egunero jotzen du

 holako enbatak,

 gure diruz mantenduz

 holako piratak.

 Deklara ezazue

 bakoitzaren zorra,

 beteaz altxorra,

 ta ez zaigu faltako

 inoiz ere porra,

 bide hori omen da

 benetan jatorra,

 deklaratu ezean

 daiteke izorra,

 nahi duena egiteko

 lege orokorra.