Euskara
Zaldubi
Udara joanda denok lanera
berriro itzuli gara,
beraz nengoen asperturikan
beti entzuten erdera,
ez nekien non arkitzen nintzen
ta non ote zen euskara;
atzerritarrak beti nagusi
begira Donostiara!
Gure hizkuntza bazterturikan
eta nagusi bestea,
bainan ez pentsa erdera denik
gurea baino hobea,
gure hizkuntza geurea data
inoren lotsik gabea,
ez zen horrela egongo, balitz
erdera bezain maitea.
Etsaiak daude ezarri nahiaz
erdera aspalditikan
beren asmoak ia lorturik
zenbaiti nahasturikan:
"Begiratzeko Europara
hizkuntzak ikasirikan".
Euskarak ez du hola izanen
ofizialtasunikan.
Era honetan mintzatzen dira
eta, etsaia da alai,
Euskal Herrian ofizialki
euskararik ez dute nahi;
artzai gaiztoak diren lekuan
otsoa da maiz lasai,
bainan herriak oihukatzen du:
"nik euskaraki bai ta bai".
Erdara dugu sasi hizkuntza
bortxakeriz ezarria,
euskara behingoz desegin nahi
duen errota harria,
naizta oraindik euskarak ukan
bere egoera larria
ez da itzaliko herriak duen
euskararen egarria.
Gure euskara zapaldu eta,
egin nahi dute grina,
bainan euskarak gure herrian
adinez badu adina;
eskatzen dugu izan dadila
denean erdera haina,
naizta etsaiak desegin nahi
gure herrian arima.
Euskal eskolak hastera doaz
Euskal Herrian barrena,
ez dakienak euskaldunduaz
ikas dezala lehena
eta euskaldun diren guztiak
alfabetatu hurrena;
Euskal Herrian izan behar du
euskara nagusiena.
Euskara zaharra esnatu hadi
eta ireki begiak,
idatzi hitzak liburu eta
euskaraz aldizkariak,
eta jendeak hitzegitean
utzi ditzala nagiak,
Euskal Herriko hizkuntza data
mintza dezala herriak.
Egunkariak izan ohi dira
eguneroko jardunak,
beren lanetan uzten gaituzte
bazterturik euskaldunak,
euskal txostenak bila arita
pasa ditut maiz egunak,
kunplitzegatik hondarrak dira
agertzen dizkigutenak.
Arrazoirikan ba ote duten
inoiz galde egitean
hoiek diote "ez da rentable
ta nola ari kaltean".
Ez dut sinesten euskara maite
dutela hoik esatean,
euskararekin ez da jolasten
beraz maite izatean.
