inprimatu
Eskopeteroei kotoa
Izenburua:
Eskopeteroei kotoa
Sinadura:
Zaldubi, [Gesalaga, Jose Antonio ?]
Urkizaren iruzkina:
Egilea(k):
Gesalaga, Jose Antonio

Argitalpena:
Zeruko Argia.
Urtea:
1988
Argitalpenaren urtea:
Alea:
1218.zk.
Orrialdea:
56

 

 

 

 

faksimilea ikusteko


Eskopeteroei kotoa

 

Zaldubi

 

 Uste gabean iritsi zaigu

 guregana Udazkena,

 berdea hori eta hostoa

 orbel bilakatzen dena,

 hego haizeak astindu ohi du

 aurrean dadukan dena,

 txoriak ere ihesi doaz

 gure mendietan barrena,

 errukirik ez edukitzea

 ez al da gauzik txarrena?

 

 Gizonarentzat txoria beti

 izaten da betizua,

 bere bizitzan lehen ikusiak

 edukitzen du piska,

 halaxe ere hotzen beldurrez

 egin behar du pausua,

 epel piska bat aurkitu nahian

 etortzen zaigu usua,

 ez daki nora abiatu den,

 errugabeko gaisua...

 

 Txoriak txori jaio zenean

 egin al zuen pekatu?

 Edo besteaa gizonezkoak

 nola horrela tokatu?

 Bere bizitza oso garesti

 ez al dute alokatu?

 Hil edo bizi duen ruletan

 txikienari tokatu,

 eta hargatik txori gaisuak

 bihotz gabe tirokatu.

 

 Txoria berez denontzat dugu

 maitale eta eztia,

 eta sarritan txoriei esker

 gizona da amestia,

 baina halere beraien aurka

 txolartetako astia,

 itxuraz gizon deitzen dena

 ez al da basa piztia?

 Gure lurretik pasatzeak du

 oso zerga garestia.

 

 Zeru erdian agertzen dira

 mordoskaka zabal-zabal,

 batzuek euren ahaleginetan

 besteak zeharo apal,

 hoiek pakean ez lagatzeko

 gizona ez dago kabal,

 egun hauetan entzun ditugu

 horrenbeste tiro tamal,

 gero lurrean gelditzen dira

 milaka kartutxo azal.

 

 Hesi batzutan ezkutatuta

 aurkitzen da ehiztaria,

 bere etxera eraman nahian

 egun hortako saria,

 eskopetatik irteten zaio

 bere suaren haria,

 berunez bete ta erortzen da

 txoriño hegalaria,

 oraindik ere gizona dugu

 pizti harrapakaria.

 

 Alde batera ikusi eta

 burutik dago eroa:

 Camuflaje-ko jantzia eta

 Gillen Tellen sonbreroa,

 gerri guztia kartutxoz bete

 ta aurkitzen da beroa,

 gerlari baten antzera dago

 gure eskopeteroa,

 ez zaio asko oroitzen horri

 txori gaisuen geroa.

 

 Mendi hauetan ez da entzungo

 urre txindorraren kanta,

 okila, tarin, txolarre, eper,

 eta zozoa ere falta,

 eta gaur egun ehiza egiten

 ari da kalte galanta,

 egun batean buka daiteke

 txori doinu ta zarata,

 ehiztari eta eskopetero

 hiltzaile gehiegi da-ta.

 


inprimatu