Arrazoidutenen arrazoieza

Zaldubi

 Zergatik hemen armaren jasa,

 ugaltzen zaigu kale ta plaza?

 etxean ere ilunduz gero

 kexu gaude ta ez lasa, (bis)

 hau ote da gure baza?

 zuri den arren arraza,

 askatzeko da eskasa;

 radio bana ta armaturik

 etorri hainbeste fatxa,

 ta horregatik falta zaizkigu

 egun Zabala ta Lasa. (bis)

 Tamalez dena bete txakurrez,

 ertz guztietan, atze ta aurrez,

 rekord berria gainditu dute

 «rugby» lanen muturrez, (bis)

 orduak doaz beldurrez,

 radarrak aide ta lurrez,

 ikusi era makurrez,

 sistema honek kaltea dakar

 torturaz edo egurrez,

 askoz gehiago politikoek

 kantalotsaren gezurrez. (bis)

 Politikoek naute azpertu,

 pakeagatik mintzoa lehertu,

 baina ondoren zurikeriaz

 pake bideak baztertu, (bis)

 hemengo dena okertu,

 nagusi zena maiztertu,

 espainolena edertu,

 zergatik dute Euskal Herrian

 gerra zikina suspertu,

 ifarraldean sartu ta gero

 bi lagun on desagertu. (bis)

 Gure herrian gerra zikina,

 Madril aldetik gogoz egina,

 Hegoan eta Ifar aldean

 ezarriz lege berdina, (bis)

 legez kanpoko dotrina,

 azpikeria gordina,

 non den eskea hor mina,

 bandera jarri nahi dute hoiek

 baztertuaz ikurrina,

 nagusi arrotz bat dugulako

 herriak dauka samina. (bis)

 Sarritan dira su eta garrak,

 eta ondoren mintzo zantarrak,

 alde batetik eginez gero

 bestearen deihadarrak, (bis)

 ia hautsirik paparrak,

 besteak direla txarrak,

 jartzeko lege zakarrak,

 pake aitzakiz esku librekin

 piztuz gerraren txingarrak,

 isilik egon zarete baina

 non dira bi Tolosarrak? (bis)

 Akerren gisa oker gabiltza,

 ez bait da hola gure aritza,

 baina bilatu beharko dugu

 etorkizunaren giltza, (bis)

 zergatik hainbeste fitxa,

 polizientzat egoitza,

 ta armamentu bortitza,

 arrotzek hemen aginduz gero

 ez bait da ona emaitza,

 emengoentzat utz dezatela

 hemengo buruzagitza. (bis)