Nere erria

Lexo

 -I-

 Milla beatzireun irurogeita

 amabosgarrengo ustez,

 alderdikeri gabe, errira,

 begira jarri naiz ustez.

 Pentsatzen nago, i ere Lezo,

 ornitu aiz buruaustez;

 urteak joan da "progresoaren"

 akatsez edo birtutez.

 -II-

 Gu ume giñan, orduan ez zun,

 gaur egunean dun antzik.

 Orixe lasai esan diteke,

 ortan ez dago zalantzik.

 Gaur dagon jende erdirik ez zan,

 ezta-re gaurko izkuntzik.

 O ontziñako erri maitea,

 nere partetik goraintzik.

 -III-

 Zenbaitek dio komeni dela

 aunditutzea erria.

 Esan diteke uste dutela

 ote den dena urria.

 Baiña orretan bakarrik badu

 bere gose egarria.

 Muiñik gabeko aunditze ori

 gauza urrikalgarria.

 -IV-

 Kanpotik onuntz etorri eta

 ogibidean jarriak.

 Lanez ornitu eta eskeiñi

 etxebizitza erriak.

 Ori guzia egin duk, Lezo:

 eta landare berriak

 izango dituk geientsuenak

 etsai ikaragarriak.

 -V-

 Jakin bear duk au esatean

 zertaz naizen gogoratzen.

 Kristoren itzak izango dituk,

 ni ez banauk deskuidatzen:

 esaten zian bi jaun serbitzen

 iñork ez zula asmatzen;

 Nerekin biltzen ez duen arek

 nere aurka du zabaltzen.

 -VI -

 Jarri zazute krabelin edo

 larrosa ontzi batean.

 Iraun dezake iñork laguntza

 egiten dion artean.

 Naiz ta ez jardun beraren aurka

 amorru bete betean,

 igartuko da ardura gabe

 uzten bazaio pakean.

 -VII-

 Ez da prezixo, beraz, errian

 aurka ziñez jokatzea,

 Bestela ere etorri leike

 erriaren ondatzea.

 Aski da gure oiturak eta

 izkuntza ez maitatzea.

 Ortik aurrera bakarrik dator

 erri gaixoa iltzea.

 -VIII-

 Zenbat fameli ote dituk or

 ire babesa dutenak.

 Nunbaitetikan etorri eta

 gozoro igan daudenak.

 Baiña biotza erdibitzen duk,

 nolatan ez lertu penak?

 Ik bizileku emanagatik

 i maitatzen ez autenak.

 -IX-

 Au ikusirik, nor ez da jartzen

 biotz barrutik miñetan?

 Ikusitzean gure izkuntza

 zenbait jenderen oiñetan.

 Jainkoak dakin tokitik datoz

 ta sarri gure gaiñetan.

 Au ez da iñon gertako baizik

 Euskal Erriko sailletan.

 -X-

 Bateren batek pentsa dezake

 geiegi naizela mintza.

 Okerbidetik baldin banago

 neuk jango dut nere itza.

 Baiña errexki ez da irtengo

 gaur barruan dagon gaitza.

 Naiago nuke askotaz ere

 dexkuidatuko banintza.