Seme galduari, herriari: ama batek
Haltzadi
Barrenak ez dit agintze
baina noa hastea,
isiltasunak ezartzen
duen muga haustea,
zorigaitz batek lur jota
nagola esatea,
bihotza ahul darabilkit
sentimentuz betea.
betiko agurtzen zaitut
nere seme maitea.
geroztik ama daukazu
ilun eta tristea.
Ideiak sendoak eta
borondatea fina.
bihotzez biguna zinen
izpiritua burdina.
Gizartearen laguntza
izan duzu dotrina,
euskararen alde berriz
hamaika lan egina,
arinduko litzateke
dadukadan samina,
gure artean bizirik
aurkituko bazina.
Herri txiki batetako
baserriko mutila,
lan egin behar zenean
beti zeunden hurbila,
gaztetandik kezkatua
libertateen bila,
bortitz jasorik eskuan
euskaldunen makila,
orain etsaiaren armak
ta gorrotoak hila,
herriak eredu zaitu,
semea esker mila!
Azter dezagun batera
barneko gogoeta,
haizetara zabaltzeko
joko dugu tronpeta,
herria hamaika katez
lotuta daukate-ta,
ito nahi dute arnasa
isildu nahi poeta,
burruka egin dutenak
itzalean gordeta,
baina ez dugu sekula
makurtuko kopeta.
Nik ez dakit nere hitza
konprenitzen dezuten,
hondatzen hasia nago
gauza berak entzuten,
lehen diktadurakoak
nola irain ziguten,
baina guk jakin genuen
zutik ttinko irauten,
horra orain demokratak
zer eskaintzen diguten,
hasteko nere semea
hamar balaz hil zuten.
Maite zuen herriari
bizitza eskaintzean,
borrokalariek beti
egin duten antzean,
jarri ninduen erabat
amiltzeko trantzean,
hura zen minbera eta
samina bihotzean,
izan ere maitea den
semetxoa galtzean,
loreak ere goibeltzen
zaizkigu baratzean.
Zure amaren aurrean
orain gorputz zaudela
mundu txar honen gainetik
nahi nuke errebela,
hain gertaera tamala,
zital eta hergela,
baina etsaiek betiko
pentsatu dezatela,
herri zahar honen arima
desagertzen ez dela,
eta Aitaren Etxea
defenditzen gaudela.
Amen semeenganako
jaiotzeko lotura,
hil arteraino irauten
dun gozotasun hura,
maitasunak agintzen du
maitemindu modura,
baina nonbait bereizteko
une latza heldu da,
semearen hutsuneak
sortzen duen tristura,
hego bihurtzen da ipar
haizearen freskura.
Adierazten dut dena
herriak jakin dezan,
giro alai haiek sortzen
zu hainekorik ez zan,
guraso, aiton-amonak,
sendiak goza zezan,
asmo ta itxaropenak
etxekoen gerizan,
orain gure bihotz-mina
zein haundia den izan,
barrun daramagu baina
hitzez ezin da esan.
Gertaera honek sakon
erauntsi dit bihotza,
baina samintasun hontan
egin nahi dut aitortza,
buka daitezela azkar
gerra ta heriotza,
horra herriaren oihu,
ta garraisi zorrotza,
haizeak ekar dezala
elkarrizketen hotsa,
ta askatasunarekin
bakearen jaiotza.
Nork ez du Euskal Herrian
jasan une tristerik,
hainbeste seme-alaba
askatasun gaberik,
hilak, herbestean edo
gartzeletan gorderik,
nahiago nuke guretzat
egoera hoberik,
nahi baldin bada herrian
bakea egiterik,
ez dute geurea dana
ematea besterik.
Gero hobe batek beti
ahaleginak dakartza,
mahastian ere ia
heldurik da mahatsa,
bidean ordea bada
oztopo ta arantza,
baina Euskal Herri Zaharrak
beste askoren antza,
askatasunaren bila
altxako da gorantza,
ez baita sekula galtzen
herrien esperantza.
|