Migel Arbiza
Uranga, Juan Ignacio
Bako jaunaren adiskidiak
Oso pozturik dabiltza
Zurrutan bidez balantz egiñaz
Seaska zarraren gisa;
Lengo batian Plaza zarrian
Bandera bat zuten iza,
Turkiyatarren embajadore
Egin dalako Arbiza.
Embajadore obeagorik
Ezin liteke arkitu,
Lan ontarako papar guztiyak
Garbiro jasuak ditu;
Emengo kale zabal abetan
Eziñ dala kabitu
Gerri ezurrak ate zarraren
Gisa zayozka nagitu.
Iskribandegi asko daukazki
Non nai aukeran jarriyak,
Eta echia debalde diyo
Beretzat jatzen erriyak;
Ezagutuak daukazki ondo
Konsejupeko arriyak,
Ardoz egoki egiten ditu
Turkitar letra larriyak.
Turkiyatarrez egunero da
Ondo jautziriki ibiltzen,
Umeak pozturik biltzen;
Isketa luze aspert eziñaz
Ez da aguro isiltzen,
Egarririkan ez dubelako
Arroz ta zizarrez iltzen.
Gaur baldin bada embajadore
Gorago liteke iyo,
Zergatik duben turkiyarako
Bear dan ain bat baliyo;
Ango goyenak aginteari
Baldiñ utzitzen badiyo,
Emperadore ona izango
Dala, biriro naiz fiyo.
Arbizak orain egin bear du
Nafarruakin tratua,
Oker ibiltze gaba sar dediñ
Bere echera ardua;
Nola daguen air barrenera
Turki gortean sartua,
Santero-nian dauka baretzat
Eche bizitza artua.
Nola Arbiza ez da egoten
Eche zokuan gordea,
Askotan diyo ardo beltz orrek
Kentzen burutik kordea;
Irichi zayo irabazi ta
Merezi zuben lorea,
Turkitar denak deitu diyote
Biba embajadorea.