Gure pelotariyak. Pedro Arrese-Igor (Portal)
Uranga, Juan Ignacio
Idi, uztarri eta akullu
Utzirik era bat oso,
Pelotaritza ager zitzaiyon
Beretzat guztiz eroso;
Igarri zuben itzantzan zala
Biziko beti nekoso,
Argatik orain dago igeri
Urre putzutan chit gozo.
Aurre jokuan gogorra dala
Denok degu aitormena,
Orren besuak dala diruri
Argin malluan kirtena;
Pelotaritzan achitua du
Malla goitsu ta lenena,
Plazan aguro begiz jotzen du
Utz-unak duben legena.
Beso biurrez gogor jotzen du
Besagaindikan ere bai,
Ez da estutzen ezergatikan,
Guztiz ibiltzen da lasai;
Jartzen danian chishterarekin
Joku kontrakuaren zai
Erakusten du noraño duben
Indarrez pelota jo nai.
Plaza barrengo autzak ederki
Ditu chishteraz astintzen
Eta besua ondo badauka
Ez du jokurik arintzen;
Atze aldetik asten danian
Aurrekuari agintzen,
Berak nai duben gisa, pelota
Du joerakin zatitzen.
Iruratikan agertua da
Orlako pelotariya,
Aurrenetikan izandu zana
Jokalai eskulariya;
Begi zorrotzez ikusi ziyon
Joku oni belarriya,
Argatik orain deitzen diyote
Portal ikaragarriya.