Ezkonberri batzuri kontsejuak
Uranga, Imanol
-1-
Andutz azpiko babes goxoan
zeguan zure etxia,
antxe zeunden zu krabeliña bat
ostrotxuekin jantzia.
Parejo gazte maitagarria,
gaur da zuen ezkontzia,
opa dizutet urte askuan
zorionez bizitzia.
-2-
Zuen ezkontza izandua da
gaur Itziar'ko elizan,
zeru erdian ez geundenikan
ia etziteken esan.
Bi gazte maite juntatu dira
aingeru batzuen gisan,
azi zeraten sukalde xarra
aurrera goguan izan.
-3-
Kontseju batzuk eman beitzuet
zuengana etorririk,
asko ta ondo nai izateak
beiñere eztu neurririk.
Ai, gorabera asko dirade
bizimoduan jarririk,
diruarentzat iñoiz ez izan
geiegizko egarririk.
-4-
Atsekabiak izaten ditu
pobre eta aberatsak,
bizimoduan txandan dirade
une goixo eta latzak.
Oso alkarren urrian dira
larrosak eta arantzak,
pazientzian ondo eraman
bata-bestian akatsak.
-5-
Gure mundua jarria dago
lau aldetara antsiaz,
moda eztakite nola atera
illajeraz ta jantziaz.
Aurtxo batzuek sortzen badira,
ta, artu pazientziaz,
maitasunian aei goxoki
euskera erakutsiaz.
-6-
Aizu gizona, lagun artera
egin bear da bixita,
etxe-zuloan sartuta beti
ezin diteke bizi-ta.
Baiña etxera ez erretirau
mandamentuak autsita,
ezer eztezu irabaziko
takarkerian asita,
-7-
Etxera igual juango zera
iñoiz garai beranduan,
muxintasunik ezta paltako
agian zure onduan.
Gizon maitia, bai al dakizu
nola jokatu orduan?
obedituta ixilik egon
arrazoia nola duan.
-8-
Asarraldiak izango dira,
ortan dudarik ez izan,
inportantzirik ez bedi gerta
lizun, gaiztuaren gisan.
Zuen arteko pentsamentuak
konpiantza guziz esan,
zuen arteko goixotasunak
azkenik izan eztezan.
-9-
Lujoko gauzak tentaziuak
izaten ditu munduan,
baiña ikusi bizimoduak
noraino agintzen duan.
Inbiriarik ez eduki ta,
bizi alkarren onduan,
sekula etzaiteztela sartu
iñoren bizimoduan.
-10-
Ogeitazortzi urtetik beera,
oraindik zerate gazte,
errespetatu, senarra senar,
ta emaztea emazte.
Neskame-morroi alkar artzerik
inoiz etzazute uste,
arrazoiari bidez begitu
batak bestiak ainbeste.
-11-
Lana egiñaz igual astia
izanduko da luzia,
sakrifizio egin gaberik
eztago gure bizia.
Jai egunetan deskantsa ondo;
lenbizi entzun mezia,
familirako palta eztedin
Jaungoikoaren grazia.
-12-
Lagun txarrikan baldin badezu
izan zaiozu erruki,
baiña berekin tratatutzeko
bidia azkar ebaki.
Iñorentzako gorroturik ez,
apaltasuna eduki,
pobre izanda-re modu onetan
bizi diteke ederki.