Langileen egunerako
Ugalde, Mikel
-1-
Bertsok jartzeko pentsamentua
etorria zait burura,
kantatu nairik gaurko langillek
nabari duen tristura.
Lantegietan darabilkite
makina baten modura,
ta nagusia aberasten da
langillearen kontura.
-2-
Len txabola bat tallertzat zeukan
gero lantegi aundia.
«Onek dirua nun atera du?»
galdezka dabil jendia.
«Langillen bizkar irabaziaz»
au da erantzun garbia,
besten izerdiz ez da agortu
bere diru iturria.
-3-
Gizarte ontan guztia dago
bata bestearen aurka
diru dutenek zapaltzen dute
langille soilla indarka.
Langilleriak ezin dezake
iñolaz joka bakarka.
Aurrerantzean elkar gaitezen,
zor zaigunikan ez barka!
-4-
Ez pentsa gero emen jarriak
ditezkenikan gezurrak.
Gaztetandikan nekatu ditu
langillek bizkar egurrak.
Soldatan ordez jasoak ditu
jipoiak eta egurrak.
Zaarturikan ementxe dago
jubilatzeko bildurrak.
-5-
Ez pentsa gero dezakezunik
baja artzeko aukera,
bearrezko dan jornalik gabe
bertan geldituko zera;
partikularrez medikuetan
agian, asten bazera
langille zeran orrentzat bada
dirutan naiko galera.
-6-
Itsas lanetan, mina zulotan,
zenbat berri txar da mingots?
Goizean goizik laneraturik
gauean berriz hor ill-otz.
Ez bear batek moztuak ditu
langille bizitzak zorrotz,
an eta emen lantegietan
zenbat naigabe ta eriotz?
-7-
Amaika huega eta borroka
eskubideak lortzeko,
lantegietan zebiltzen aurrak
eskoletara sartzeko,
eguneroko lan aldi ura
zortzira jextarazteko.
Zenbat borroka, zenbat eriotz
zindikatak indartzeko?
-8-
Jorra dezagun, landu dezagun
arantza artean baratza,
Langillerian alkartasuna
dugu munduan ardatza.
Sindikatuen askatasuna
janari on baten gatza.
Asmo onenez ospa dezagun
gaur langilleen maiatza.