"Humanae vitae"
Ugalde, Mikel
-1-
Azken aldean gizadi dana
dijoakigu ugaritzen
umetan iltzen zitzaizkigunak
sendagaiekin ezitzen.
Martxa honetan erabakiak
askar ez badira artzen
jaio giñaden mundu honetan
ez dago giro bizitzen.
-2-
Kezkaturikan arkitzen dira
senar emazte gazteak
seme alabak ugaritzen ta,
buruko miñez beteak.
Pamiliaren galera dakar
berriro sortarazteak
kristau legeak jarrai nahi dunak
baditu buruausteak.
-3-
Egun batean ezkondu ziran
maitasunen eragiñaz
gerora, berriz, bizitzekotan
egintza onak egiñaz.
Zoritxarrean, kezkati daude
bitez-animaren miñaz
elkarturikan seme-alabak
jaio arazi eziñaz.
-4-
Gizaki orok nabaitutzen du
zorionaren beharra
horretarako maitasuna da
danontzat bide bakarra.
Senarrak maite du emaztea
ta honek bere senarra.
ezin diteke nolanahi moztu
ezkontzak duan indarra.
-5-
Ezkontzaz eta jaiotzaz ere
ar zagun bide zuzena
geure pausoa izan dedilla
beti maitasunarena
Alkar maitatuz bizi gaitian
indartuz itxaropena
giza-legea bete dezagun
neurtuaz ondorena.
-6-
Gizaki danak gogoan artu.
bada, beste arazoa
aurrerapenak ugaritzea
danontzako erosoa?
Konsumoaren menpean dago
gaurko gizarte osoa
Nolatan autsi kapitalismo
sistemaren erasoa?
-7-
Etxe-bizitza eskuratzeko
egin behar diran lanak
ogei urtean zorpean daude
ia ezkonberri danak.
Amabi ordu lana egiñaz
«suerte» (?) hori dutenak
nahiko gurutze berekin dute
lanetik bizi diranak.
-8-
Ezingo dezu pentsatu gabe
semeak jaio-arazi
Ondorengoak jatortasunez
behar du azi ta ezi.
Honek berekin duan prolemaz
arren etzaitez igesi
bide estuak ez dezaigula
sendi-maitasunek autsi.
-9-
Diskusioak gehitu dirade
pastillak, bai, pastillak ez,
gai hau dala ta erabakia
artzea ez baizan errez.
Aita Santuak esan berri du
maitasunez bizi bitez,
giza legea aintzat artuaz
kristau zintzoen egitez
-10-
Jakintzak ere aztertu beza
eha nola diran gauzak
bere argiak lasaitu ditzan
ezkondu danen biotzak.
Maitetasunik ez beza galdu
iñungo-agindu zorrotzak
Goiko graziak lagun bezaigu
kristatuz gure ezkontzak.
-11-
Arren anaiak une honetan
kementsu joka dezagun
bide zuzena aukeratuaz
naiz ateo naiz fededun.
Aita Santuak «Humanae Vitae»n
esandakoari entzun.
Aurrerantzean gizakumeok
kontzientziari erantzun.
