Albiste txar bat mundu guzian
Ugalde, Mikel
-1-
Albiste txar bat mundu guzian
biziki zaigu zabaldu,
errusitarrak Txekoeslobaki
nolatan nai duten galdu.
Orretarako armak artuta
bertara dira azaldu,
indarrarekin bizia kenduz,
etorkizuna zapaldu.
-2-
Len Poloni'n da, Hungria'n gero,
orain berriz txekotarrak,
beuren begiak ez ikusitzen
erritar oien negarrak.
Bein da berriro jabetu dira
gorrotoaren su-garrak,
mundu onetan ez du lekurik
arrazoiaren indarrak.
-3-
Txekoeslobaki'k rusoen mende
galduko ote bizia?
ikusten danez, emen indarrak
beti du irabazia.
Nere biotzak geldegiten dit:
nun dago demokrazia?
nun da legea, askatasuna,
nun egizko justizia?
-4-
Gorrotatzen det izkilluekin
ezarritako pakea,
illen artean kanposantuan
gertatzen dana obea.
Erri bakoitzak bear du izan
etorkizunan jabea,
ez ote degu aintzat artuko
jatorrizko dan legea?
-5-
Gure bizitzan gertatzen dira
amaika gauza itxusi,
zuzentasuna indar menpean
oraintsu degu ikusi.
Bide orretan ezingo dezu
luzaroan gogor eutsi,
erria tiroz ezin diteke
betiko galdu, Errusi.
-6-
Mundu guzira eskatu dute
txekoak laguntasuna,
baña guziok ikusi degu
eman degun erantzuna.
Pekatari da Errusia ta
pekatari euskalduna,
gure postura ikusirikan
nor ez degu erruduna?
-7-
Zuzen jokatzen saia gaitean
gure zeregin danetan,
egizaleak izan gaitezen
egite eta lanetan.
Pake osoa zabaldu bedi
baserri eta kaletan,
justizia ta askatasuna
maite izanaz benetan.
-8-
Une onetan ezin ba jakin
arazo onen bukaera,
rusoen aurka jarrai bearko
euren burruka aurrera.
indarra nun dan erakusteko
daukate naiko aukera,
berriro ere aula menpeko
lotan gelditzen bagera.
-9-
Mundu onetan gizon guziok
egizko anai gerade,
alkarturikan maitatutzeko
biotzetikan prest gaude.
Gu euskaldunok ager gaitezen
zuzentasunan maitale,
geure bizia eskeñiz beti
egi-pakearen alde.
-10-
Gorrotoaren lege zakarrak
busti du txekoen lurra,
gau illunean nagusitu da
askatasunen lapurra.
Nere anaia nola ote dan
barnean daukat beldurra,
lagun zaitudan Tauer'tar Norbert,
bijoakizu agurra!
-11-
Benetan oso mingarri izan da
rusoen erabakia,
indarkeria ikusi degu
txekoen aurka jaikia.
Anai naizenez del egingo det:
«maitatutzen det pakea»,
orain da beti esan dezadan:
Gora Txekoeslobakia!!