Usurbila bake bila
-1-
Hernanitikan bertso kantari
berriro gu Usurbila,
lehenengo gure agurra hartu,
Saizar aldeko koadrila.
Lagun giroan goaz gizonki,
ez setakeria bila,
gugan duzuen laztasun hori,
arren, legundu dadila.
-2-
Zer eta nola gertatu zaigun
argi eta garbi esan
nahi genuke gaur ez dakienak
egi dena jakin dezan;
hernaniarrok egindakoa
gonbidatze bakarra zan...,
zuengandikako erantzuna
ez al da gogorra izan?
-3-
Hortzak erakustea omen da
zuen kontsigna bakarra,
auzo lagunak, ez ote da hau
txit erabaki zakarra?
Guk maiteago bihotz alai ta
ezpaineko irriparra,
anaia artean ez da atsegin
gorrotoaren aparra.
-4-
Zuen bertsoak irakurri ta
gaude sinistu ezinez...
Nola demontre gu igurtzitzea
nahi gaituzue osinez?
Diozuenez atera behar
dugu tripetako minez...
Pasako zaigu, Saizar aldean
trago batzuek eginez.
-5-
Indarra sobra omen dago ta
hemen gatoz Usurbila
Hernanitikan bertsotarako
kilobatioen bila:
upeletikan jarabea ta
kaxuelako papila...
Orain gainezka omen daukate
jakinduriaz aspila.
-6-
Zorroztasuna nabarmen dauka
zuen bertsoen ezpalak,
guk ez ditugu zital astintzen
ez haizkora ta ez palak.
Burua bere tokian jarri,
izan gaitezen apalak,
arrisku latza baitu berekin
goregi dagon apalak.
-7-
Gure aldetik nahi bakarra zan
lagunarte bat igaro.
Ez dago hemen zertan jarririk
«ni igitai ta hi garo».
Lehen ere horrek itsusitu du
hainbat zelai eta soro...
Gizonki joka dezagun denok,
ez zentzugabeko zoro.
-8-
Aitortu nahi genuke egia,
jarriak gaude kezketan,
bildur baikara ote zaudeten
itxuraik ez dun kasketan;
ezten zorrotza dabilkizue
zuen bertsozko hizketan,
itsusia da auzo artean
hastea zimaur nahasketan.
-9-
Gutaz behartuz gero sekula,
etorri gizon pausoan,
beti hartuko zaituztegu ta
anaia antzera besoan;
garen apurra eskaintzeko prest
gaude maiztasun osoan,
herri lagun bat non daukazuen
badakizue auzoan.
-10-
Ez aurka, baizik alde nahi dugu
bertsoa maite dugunak,
bestela oso moztuko'itugu
gure pitxien egunak;
berriro ere zain gaude eta
bidali kopla legunak...
Agur Usurbil, beste bat arte;
besarkada bat, legunak.