Ezin eskutitzak euskaraz idatzi
Txuria
Arrotzen hizkuntzara
gaituzte behartu,
hizkuntzik zaharrena
nahirikan baztertu;
bire zuzena dena
nahi dute okertu,
bainan gurea ez dena
ez dugu nahi hartu,
euskaldunak euskera
bizitu behar du.
Euskera beti izan da
guretzat oinarri,
araba zaharrek ere
zuten ondo igarri;
gaurko eguneraino
digute ekarri
bai ta ere eusteko
birea ezarri
beraren alde izan
gaitezen gudari.
Euskalduna, erne ibili
hara zure albora,
haur txikia dagola
zerorri begira;
zuk dittuzun esanak
bereak bait dira,
ikasi nahi du bere
Herriko segira,
geroa zure aurrean
gira eta bira.
Euskadiko zati bat
gaude gaur gartzelan,
euskerarekin gabiltz
gu betiko deman;
eskutitzak etxera
heltzeko, nahiko lan,
euskeraz agurra nahi
eta ezin eman,
txantxangorri mutuak
gaude gu kaiolan.
Hizkuntzaren ateak
dizkigute itxi,
daukaten gorrotoa
digute erakutsi;
erabaki duguna
gureari eutsi,
ez dugu inola nahi
ez etsi, ez utzi,
euskera askatzeko
bihar edo etzi.
Pillo bat eskutitza
dago galazia,
igartu nahiean han
dijoan hazia;
gure harreman dana,
ixilerazia,
abertzaleak hor
dauka ikasia,
denon artean eman
zaiogun bizia.
Ez sinixtu jauntxoen
hitzaren epela,
bera baita euskeraren
engainu zitala;
dadukaten mingaina
da guztiz ustela,
zuzen izan gaitezen
lehengoak bezela,
hilla ikusiko dugu
euskera bestela.
Euskalduna ez dugu
ez, arraza duna,
ez milla apillidu
euskaldun dittuna;
ezta txapel batekin
azaltzen zaizuna,
arrazoi hoien kontra
txertatu bakuna,
euskera da euskaldun
egiten gaittuna.
Guk borroka honetan
ezin dugu galdu,
erdera Castillara
behar da bialdu;
euskera erabili
landu ta zabaldu,
bere sugarra iñoiz
ez dedin itzaldu,
Herria askatzea
merezi ez al du?
Arazoa denona
da, ez izan dudik,
kanpoan larriago
duzue oraindik;
inolana egin gogor
zuek denek handik,
guk bultzako dugula
seguru hemendik
zabaldu dedin zazpi
herrialdetatik.
|