Ama bati
Ttanborra
Lau aldiz ame zara hogeitabost urtez
eta autobusez zoaz Tolosara bidez.
Egun bateko haurra amodio galdez
besotan daramatzu ezinean maitez.
Errudun sentitu naiz espaldiko partez.
Egun bateko haurra zure magalean
ikusi dudanean maitasun galdean
eta nihaur sentitu gozo epelean
nahi dudan guztia lortu ahalean,
zirrara ernatu da ene sabelan.
Bost urtetan lau ume eman maitasunak,
injustiziak eta ezjakintasunak,
izerdi nekez hazi behar dituzunak.
Ezinak bihotzean sorturiko ilunak
estali ditu zure begi argidunak.
Zure begietako beso urdinak
ez ditu ezagutzen pozezko uhinak.
Aldiz, ezpainetako irrifar ezinek
adierazten dizkigu beharraren minek
zure barnean erein dituen saminak.
Orduak pasa eta zutaz oroitzean,
zure amatasunea eta eza lotzean,
halako herstura zait sortzen bihotzan.
Eta inora begira diot otoitzean
nork utzi zaituen hain egoera hotzean.
Gaur dirua sobera denean edonon,
taxisarik zuretzet ez ote zen inon?
Hainbaten ahotatik: "pake eta zorion",
baina zurekin inor gaur ez da izan on.
Errukirik ba omen da, ordea ez dakit non.
Gauzak zeuden bezela oraino diraute:
aberatsek parea nahikoa badute,
familia pobreak dira semez bete.
Maitatzeak badakar horrenbeste kate,
behertsuak ezin du nahi haina maite.
Hona hemen bertsotan jasoa ama beti:
batzuek haibeste eta besteek hain guti.
Behertsua behartsu izango da beti,
nahiz eta bestela entzun gaur hainbati,
esnatu beharrean gu bagaude loti.