Balendin Berrio-Otxoa bertsolarien zaindari
Andrinua, Martzel
1.
Denok dakigu gure Balendin
Elorriotarra zala,
dantzari trebe, pelotari ta
bertsotan be ez makala.
Jainkoaz baizen bere Erriagaz
gizon zintzo ta leiela,
Bizkaian bear gendun santua,
euskaldun ta neturala.
2.
Noizbait eldu zan gure Balendin
gizon aundi izatera,
praile jakintsu, mixiolari
eta gotzain jaun, gainera.
Baina ez eban galdu egundo
lendik eukan izakera:
santuago ta meiteago zan
Balendinentzat euskera.
3.
Bere amatxok erakutsia
arturik eukan gogotan:
"Noranai, seme, joan zaitez baina
euskaldun izatekotan".
Euskeraz barba, euskeraz otoi,
bardin idatzi askotan...,
Indietatik bere amari
idazten eutsan bertsotan.
4.
Buru biotzez euskaldun danak
maitasun bi bear ditu:
Jaungoikoa ta Euskel Erria,
ez gero oker aditu.
Elorrioko Balendin onen
jokabidera begitu:
ez zen izango santu osoa
biak maite ez balitu.
5.
Guztiok dogu geure santua,
sakristau ta zapatari,
bertsolariek be bear dabe
nok entzun euren eskari.
Orra Balendin Berrio-Otxoa
bertsolarien Zaindari,
euren agotik iraun dagian
Euskal Erriak kantari.
6.
Goiko Jauna ta lurreko ama
maite ebazan batera,
biekaz bertsoz jarduten eban
seme on baten antzera.
Maitasun baten lotzen ebazan
sinismena ta euskera,
ez eban bata, besteagaitik
zetan bota baztarrera.
7.
Sarri askotan bertsolariek
estu dabiltza, gaixoak,
puntu ta tema ezin eratuz
nai baizen goxo bertsoak.
Besterik ezta, argitzen ditu
ardo-xurruta goxoak;
gaurtik badabe zeinek lagundu.
Balendin Berrio-Otxoak.
8.
Lendik daukazu irabazita
Balendin, zuk zeru goia,
eldu da orein guztiok zuri
santu deitzeko sasoia.
Bertsolariak dauke orretan
sekulako grazi doia:
Eurakaz ondo portatu zaite
ta laster dozu koroia!
9.
Beti izan da bertsolaria
gure erriaren maixu,
zeregin ori betetzea gaur
ez da erreza, kontizu.
Balendin, santu bertsolaria
or gure gaurko-abixu:
Euskalerriko bertsolarien
Zaindaritza zeuk artizu!
10.
Aspaldi ontan bertsolariek
egiten dabe alegin,
berbaz ta kantuz, erririk erri
euskera galdu ez dedin.
Milaka dira neke ta traba
ta ezin biderik egin;
BERTSOLARIAK ZAINDARITZAT ZEU
ARTZEN ZAITUE, BALENDIN!!