Eguberritako otoitza

Suenens, Leo-Josef

 «Da nobis Domine, fidei,

 spei et caritatis augmentum...»

 Emaizkiguzu, Jauna,

 begiak ikusteko,

 bihotz bat maitatzeko,

 eta arnasa.

 Ikusteko begiak Zuri eskatzean

 otoi daizugu Zure begiak guri emateko,

 Zuk dakusazun bezala guk ikusteko

 mundua, gizonak eta beren kondaira.

 Eta gure kondaira propioa.

 Iguzu zure pentsamenari egoki gatzaion

 egunez egun, eta orduz ordu.

 Egizu bihur gaitezen, poliki poliki,

 gu kreatzean nahi izan duzuna;

 Egizu zure ikuspuntua har dezagun,

 Zure ikuskera.

 Egin gaitzazu Zure Hitzarekiko esaneko,

 horrek bizitza oro argitu eta eraberritzen baitu.

 Emaiguzu bihotz bat maitatzeko

 haragizko bihotza eta ez harrizko bihotza,

 Jainkoa eta gizona maita ditzagun,

 Zerorren Bihotza emaiguzu, egiazki maitatzeko,

 geure buruaz ahazturik.

 Beharra dugu Zure Bihotza xerta dakigun

 besteren arazoa denean

 tapaka hain gaizki dabillen gurearen ordez.

 Izan zaite Zu, Jauna,

 gure zehar maita dezana.

 Emaiguzu Zure bihotza gure Aita maitatzeko,

 Emaiguzu Zure bihotza Maria, gure Ama, maitatzeko.

 Emaiguzu Zure bihotza zure senideak maitatzeko,

 gure ere badira-ta,

 hemen behetik maita ditzagun

 zerura aurreratu zaizkigunak

 -horrek ongi errazagoak dira maitatzen-

 maita ere ditzagun

 lurraren gaiñean alboratzen ditugunak

 eta zenbaitetan bultzatzen gaituztenak

 jakinda edo gabe.

 Eta emaiguzu arnasa

 bidealdian itoka ez goazen,

 gure birikak etengabeki egon ditezen

 oxijenoz eta egurats indargarriz beterik.

 Lagun diezagun biharreruntz aurreratzen

 atzera begiratzeke, ahalegiña neurtzeke.

 Arnasa aurpegi eman ahal diezaiogun

 gizonek -eta Zuk beraz- gugandik

 itxaoten duten guztiari.

 Arnasa itxaropena berriro edukitzeko

 bizitza gaur goizeon hasiko bailitzan;

 diren eta ez direnen kontra itxaroteko

 Zu aurrean zaitugulako, eta Zure agintza dugulako.

 Gugan gizonen esperantza denak eramanaz

 baiña baita beren atsekabe denak ere.

 Emaiguzu arnasa, edo hobeki Zure arnasa:

 Aitaren izenean Zuk bidali diguzuna,

 Zure Izpiritua, nahi duenera haizegiten duen Izpiritua.

 Boladan edo haize-kolpean,

 edo ukitu ariñez.

 Zure goiargiak jarraitzera deitzen duzunean.

 Emaiguzu Zure arnasa,

 guri arnasteko sakonetako otoitza,

 Zugandik gugana igotzen dena,

 Zure ospe-itzultzea eskatzen duena,

 Jainko-betetasuna irrikatzen duena.

 Jauna, Zure begien beharra dut,

 emaidazu fede bizi bat.

 Zure bihotzaren beharra dut,

 emaidazu oztopo gaintzaile den maitasuna.

 Zure arnasaren beharra dut,

 emaidazu Zure itxaropena,

 neretzat eta Zure Elizarentzat.

 Gaurko Eliza lekukotasun bat

 izan dedin munduarentzat

 eta honek kristauak ezagun ditzan

 beren begiratu argitsu eta lasaian,

 beren bihotzaren berotasunean

 eta baikortasun ezin suntsitu hortan,

 beren esperantza alaitsuaren

 iturri ezkutu eta aldagaitzetik

 sortzen dena.

 Otoitz hau, Jauna,

 Aldi orotarako otoitza da.

 Baiña Eguberri-bezpera honetan

 Nik eskatzen dizut

 niretzat eta nire anai-arreba guztientzat,

 orobat borondate oneko gizon guztientzat

 -urduri eta bilaketan dabiltzanak-

 begiak ezagutzeko

 Jainkoaren irritarra

 jaiotzen den Haurraren aurpegian.

 Emaiguzu bihotz berri bat onar dezagun,

 bere mezua gure dezagun

 eta bere Ebanjelioa

 egunoroko bizitzan itzul dezagun.

 Emaiguzu azkenik

 arnas indartsu eta bizgarria

 Jaunarekin ibiltzeko,

 gure pausoak bereetan jarriz,

 egunen eta datorren urtearen

 harian...